United Nations Organization (UNO) hnuaia peng pawimawh tak pakhat United Nations Development Programme (UNDP) a India ram a palai Pu Jaco Cilliers chuan ziakin April ni 26, 2017 khan Chief Minister Pu Lal Thanhawla hnenah UNDP-in Mizoram Sawrkar programme – New Economic Development Policy (NEDP) ah Sawrkar an thawhpui duh thu a rawn sawi.
A lehkhathawnah hian Jaco Colliers, Country Director leh Resident Representative, UNDP chuan UN Joint Mission hnathawh in Mizoram ah rah tha a chhuah mekna leh chumi kaltlanga mipuiten UN agency-te an chhawr tangkai mek chu lawmawm a tih thu te, henga Mizoram Sawrkar inpekna leh hmalakna chu fakawm a tih thu te leh UN agency te phur taka Sawrkar in a thawhpuinaah lawmthu a rawn sawi a ni.
UNDP in NEDP chu potential tha tak nei leh hmasawnna atan a tha lama nghawng lian tak a nei thei nia a hmuh thu te sawiin he thilah hian UNDP chuan Mizoram Sawrkar a thawhpui duh tih a sawi a. Hemi chungchanga hmalak dan tur rawn sawi hawng turin UNDP, Regional Head for North East chuan Mizoram Sawrkar a rawn dawr vat tur thu a rawn sawi tel bawk a. NEDP hian hmasawnna leh thanna tur hrang hrang a huam zau avangin ‘comprehensive growth strategy’ a ni tih chu UNDP pawhin a pawm thu sawilangin, changtlung, tha leh daihzai zawka thil awmsa leh neihsa hman tangkaina kawng hrang hrangah UNDP chu Mizoram Sawrkar thawhpui turin a phur hle tiin a sawi bawk.
UNDP chuan tunah UN leh Mizoram Sawrkar thawhho mekna tingheta hmalakna thar nei turin a in huam thu tarlangin thiamna hrang hrang (skill) ah te, entrepreneurship ah te, daih zai zawka Khuanu thil pek hrang hrang hman dan inzirtir (Natural Resource Management) ah te, tharchhuah leh hralhchhuahna kawnga market linkage siamna kawngah te leh Sustainable Development Goal nena inthlunzawm thingtlang thanna tur ruahmanna siam (village level planning) ah te hma lak an duh tih a rawn tarlang bawk a ni.
Tarlan tawh thin angin NEDP hian ram hmasawnna atana hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui anih theih nana ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nan a hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te hlawkna leh inrenchem zawka kalpui anih theih nana ruahmanna siam te hi a huam vek a. Hetiang taka huam zau leh economy a nghawng (impact) nei lian tur a nih avang hian NEDP hi Comprehensive Growth Strategy tih a ni.
