Home Minister Pu Lalchamliana’n vawiin khan Mizoram Police in mipuite himna atana hmasawnna thar an ruahman pathum - Aizawl Police Station-a All Women Police Station, Mizoram safety mobile application leh Traffic e-challan system a hawng.

He hun puala inkhawm buatsaih ah Home Minister Pu Lalchamliana chuan Mizoram Police ten mipuite leh khualzinte himna atana hmalakna thar pawimawh tak tak pathum – hmeichhe police hlangin an enkawl hmeichhia leh naupangte venghimtu tur police station, mipuite himna atana tangkai mobile application thar leh traffic police te hnathawh awlsamna tur traffic e-Challan system a taka hman theih a an tihhlawhtling ta chu lawmawm a tih thu a sawi a, Mizoram DGP Pu SBK Singh-a thahnemngaihna leh Mizoram Police te tan lakna rah liau liau a ni tiin, heng atana anmahni thawhpuitu National Informatics Centre, Aizawl hotute chungah lawmthu a sawi bawk a ni.

Home Minister chuan hmeichhe police station chu hmeichhiate leh naupangte chunga hleilenna thleng thin tih nep a, tih kian theihna hmanraw tangkai a nih bakah thil tisualtu chhuichhuah a hremna pek kawnga hmalakna a tih chak a beisei thu a sawi a, hetiang police station hi district dangah pawh hawng tura hmalak mek a ni tiin mipuiten inthlahrung hauh lova an mamawh hun apianga pan a hmang tangkai turin a sawm nghal a ni. Mizoram Police a tang lai zingah za a pasarih (7%) hmeichhia an nih thu leh hmeichhe police a tam zawk neih theih dan tur ngaihtuah a hma lak mek a nih thu a sawi bawk a ni. Mizoram Safety mobile application thar chungchang pawh sawiin home minister chuan tunlai thiamna hmanga mipuite himna tur ruahmanna thar kan nei ta chu thil chhinchhiah tlak a ni, a ti a, mipuiten hmag tangkai se a duh thu sawiin, a bikin emergency thilah a tangkai lehzual a ni a ti. Traffic e-Challan system thar chu Traffic Police mai bakah lirthei hmangtu mipuite tan a tangkai dawn a, langtlang taka hnathawhna hmanrua a ni a ti. Home Minister chuan lirthei hmangtute, a bikin lirthei khalhtute chu hunpui lo thleng tur vuakvetah fimkhur taka an lirtheite khalh turin a chah bawk a ni.

Vawiin-a Home Minister-in Aizawl District tana All Women Police Station a hawn hi Mizorama hmeichhe hlang awmna Police Station hmasa ber a ni a. Aizawl Police Station complex-ah an awmin, Investigative Unit of Crime Against Women(IUCAW), Aizawl hnuaiah an awm ang a. Hmeichhe Police Station-a thawktu zawng zawng hi hmeichhia vek an ni ang a, hmeichhia leh naupang lak hleilenna case khawih bik tura din a ni. Hmeichhe Police Station-ah hian hmeichhe hlang an awm dawn avang leh a tur bika awm an nih avangin hmeichhia leh naupang laka hleilenna thil a thlenin a tuartu tan ngaihngam tak leh thlamuang taka tlukluhna kawng a hawng tura ngaih a ni a, hei hian misual report chungchangah leh misual hrem chungchangah pawh a tha zawnga nghawng a neih theih beisei a ni. Case register leh chhui-zui chungchangahte a thawktute tan leh a tuartute tan pawh thil a awlsam phah tura ngaih a ni bawk.