Vawiin khan I&PR Conference Hall, Mamit-ah Mizo Students' Union (MSU), District Headquarters Mamit din a ni a. Dr. Lalrozama, IAS, District Bawrhsap chuan khuallian niin he hun hi a hmanpui.

Khuallian chuan thu sawiin Mamit khawpui chhunga zirlaite tanpuitu tur leh zirna kawnga khawtlangin hma kan sawnna tura MSU din a ni chu lawmawm a tih thu a sawi a. Mamit chu kan hriat angin tan lakna tur tam tak kan nei a, chung zinga tan kan lak lehzualna tur zirna kawngah pawh MSU din a ni ta chuan hmasawnna tam tak min thlen theih a beisei thu a sawi. MSU hruaitute chu khua leh tui tha ni tura midang chherchhuaktu ni tur leh mi puitling chherchhuaktu nih tum tura chahin khawtlang hruaitute leh District Administration nen theihtawpa tangho a, puih an ngaih hunah pawh a tlanchhiat dawn loh thu a sawi a ni.

He hunah hian RK Hnuna, Adviser, MSU Gen Hqrs pawhin kalkhawmte chu zirna lama thahnemngai tura fuihna thu sawiin MSU District Headquarters, Mamit-te chu ZoCareer Solutions atangin Zirna Kailawn lehkhabu a hlan nghal a ni.

J. Lalmuanzuala, Vice President, MSU General Headquarters pawhin MSU District Headquarters Mamit hruaitu tharte chu rilru sukthlek felfai tak neia pawl dangte thawhpui thiam turin a chah a.  Ngaihtuahna thianghlim taka pawl kaihruai a, a tul huna inpawtfan thei mi ni turin a chah a. Pu J. Hrangdailova, Joint VC President leh Vincent Lalpiantluanga, President, MSU District Headquarters Mamit pawhin thu an sawi bawk.

MSU District Headquarters Mamit hruaitu tharte chu heng mite hi an ni.

President - Vincent Lalpiantluanga

Vice President - CT Lalmalsawma

Secretary - Hmingthanga

Asst. Secy - Lalruatmawia

Treasurer - Zodinthari

Fin. Secy - Lalchhuangkima

MSU District Headquarters Mamit dinna programme hi Lalhmangzuala, Info & Publicity, MSU General Headquarters chuan kaihruaiin Lalthawhsaka Fanai, MSU Gen. Hqrs chuan Report a pe a. CT Lalmalsawma, Vice President MSU District Headquarters Mamit chuan kalkhawmte hnena lawmthu sawina a nei a ni.