Mizoram University (MZU) chuan kum tina kut an neih thin ‘Vibrio’ chu University Campus Tanhril ah an hmang mek a. Vawiin Vibrio 2017 Festival khar ni hian MZU Auditorium-ah Varsity Miss Contest 2017 neih a ni a, Home Minister Pu R. Lalzirliana chuan khuallian niin a hmanpui.
Pu R. Lalzirliana chuan zirtirtute leh zirlaite thawhrimna zarah MZU chuan hlawhtlinna chang chho mekin, India ram pum huap University tha tarlan zingah pawh dinhmun sang tak a nei chho zel chu fakawm a tih thu a sawi a. Sawrkar hmalakna hrang hranga thil zirbing ngai leh ngaihtuahna sen ngai chi ah MZU zirtirtuten thanhnem ngai taka sawrkar an tawiawm thin chu lawmawm a tih thu Home Minister chuan a sawi a. Lehkha zir mai bakah intih hlimna leh inkawm hona hun (co-curricular activity) tha taka kalpui zel turin zirlai kalkhawmte chu a fuih a, lehkhabu atanga hmuh theih mai loh thiamna leh hmasawnna thlentu pawimawh tak a ni, a ti. Home Minister chuan khawvel huapa Mizoram leh Mizote hriat kan hlawh chhoh zel theih nan Mizorama Zirna In sang ber MZU zirlaite chuan hma an hruai a tul a ni tiin an zir sanna leh educational qualification te chapo pui lo a, ram leh hnam tana mi tangkai leh hmasawnna thlen tu nih tum tlata an rilru siam turin a fuih a ni.
Varsity Miss Contest hi MZU Student Council buatsaih niin MZUSC Joint Secretary Laltleipuia Hmar kaihhruaina hnuaiah Varsity Miss Organizing Committee ten hma an la a. MZU Vice Chancellor Professor Lianzela’n he hun hi hmanpuiin MZUSC President Pu K.Lalnunhlima pawhin thu a sawi a ni. Miss Contest ah hian department hrang hrang atangin participants 16 telin Commerce Department atanga tel M.Com 2nd Semester zirlai Rodingpuii chu Varsity Miss atana thlan a ni. 1st runner up atan MA (Sociology) 2nd Semester zirlai Patrina VL Hruaitluangi thlan niin, 2nd runner up-ah MA (English) 2nd Semester zirlai Mary Tochhawng thlan a ni bawk.
