Cheng nuai 15 senga sak, Thingsulthliah Higher Secondary School Building thar chu nimin khan Home Minister Pu R Lalzirliana'n a hawng.

Home Minister chuan theihtawp chhuaha lehkha zira, thahnemngaihna nen hlawhtling ngei tura zirlaite fuihin mahni ke a ding thei tur khawpa thiamna tak tak pawchhuak silo, kuthnathawh zak tawk leka lehkhazir a hlauhawm hle a ni, a ti a. Zirlaite chu an hmabak theuhah tang sauh sauh a, thiam filawr nih tum turin a chah a ni. Pu R Lalzirliana chuan sorkar hmachhawp leh hmalak mekna te thlirin Mizoram tan hmabak eng tak a awm a ni tih sawiin, chu ram tha a cheng tur leh kaihruaitu tur vawiina zirlai te hi a an vannei hle a ni, a ti a. Kawlphetha siam chhuah kawngah te, ram leilung hausakna haichhuah kawngah te nasa takin sorkar-in ke a pen a, a rahchhuah chu kum reilo teah nasa takin he ram mipui te hian an tel tawh dawn a ni, Home Minister chuan a ti. Mizoram chu ram zim te nimahse Pathian tihna nen, a enkawltu ten hmangaih taka an enkawl phawt chuan ram ropui a ni thei tiin chumi tur chuan tuna mite bakah nakin lawka ram hruaitu la nimai tur Mizo thalai ten rinawmna, dikna, taihmakna leh ngaihtuahna lian tak nei chunga he ram hi kan enkawl a tul a ni, Home Minister Pu R Lalzirliana chuan a ti.

Building thar hawnna inkhawm hi Thingsulthliah VCP, Managing Board Chairman ni bawk Pu Lalrawngbawla'n a kaihruai a. Thingsulthliah Higher Secondary School Principal Pu R.Lalfakawma; Village Council Vice President Pu C Lalramchhana leh Managing Board member Pu H. Malsawmtluanga te hnen atangin report pawimawh ngaihthlak a ni bawk.

March ni 21, 2011 a sak tan Thingsulthliah Higher Secondary School Building hi Pu CL Ruala, MP (Lok Sabha) fund hmanga sak a ni a, semi pucca building niin classroom pahnih, teachers' common room, office leh Principal's room te a nei a ni. Thingsulthliah Higher Secondary School hi vantlang thahnemngaihna in April 14, 2004 khan din a ni a. A din kum hian zirlai 33 neiin kuminah hian zirlai 104 an nei mek a. Kum 7 chhungin HSSLC passed mi 203 nei tawhin result pawh kum tin passed percentage 70% chunglam an nei deuh ziah a ni. Principal hovin zirtirtu parukin an enkawl a, lump-sum Grant-in-aid dinhmunah a awm mek a ni.