Ni hnih awh tur pianphunga rualbanlo te chawikanna tur leh an hmakhua zirhona tur workshop chu vawiin khan I & PR Auditorium-ah Parliamentary Secretary Pu Lal Thanzara’n a hawng.

National Institute of Orthopedically Handicapped leh Mizoram Spastic Society tangkawp he workshop hawnna hi Pi Zokhumi Vankung, Chairperson Mizoram Spastic Society chuan a kaihruai a. Workshop hawnna sathau khawnvar chhiin Pu Lal Thanzara chuan pianphunga rualbanlo te tan bik workshop hian rah duhawm tak a chhuah ngei a beisei thu a sawi a, khatih hun laia Union Minister for Social Justice & Empowerment hmalakna a hetiang workshop pawimawh tak Aizawl-ah buatsaih a ni thei chu a lawmthu sawiin pianphunga rualbanlo te tana mi inhmang ten an chhawr tangkai ngei a duh thu a sawi a ni.

Parliamentary Secretary chuan Mizoram-ah hian seminar chi hrang hrang vawi duai lo neih a ni thin a, tuntuma pianphunga rualbanlo te tana buatsaih hian thawktute leh helama inhmangte tan rah duhawm tak a chhuah a beisei thu sawiin Mizoram chu ziak leh chhiar thiam tamna state anih avangin awlsamna thui tak a awm a ni a ti. Pianphunga rualbanlo te hmakhaw thlirin Mizoram sorkar chuan Commissioner puitling dah a tum mek a, amaherawh chu vanduai thlak takin a chhiat a that pawh hriat hmain a dodal pawl aw ring tak awm chu pawi a tih thu leh hei hi pianphunga rualbanlo te au ri a nih a rin loh thu leh ni lo hram se a duh thu a sawi a. Sorkar hmalakna apiang ah rawtna leh finchhuah tur an neih ang te chu hrilh hre ve thin turin helam kawnga inhmangte chu a sawm a ni.

Workshop hawnnaah hian NIOH, West Bengal atanga lokal Dr. Abishek Biswas chuan workshop kalphung tur leh thuhma a sawi a. Seminar chhung hian pianphunga rualbanlo hrang hrangte mamawh leh anmahni enkawl dan thupui hrang hrang hmanga mithiamte thuziak chhiara sawihona hun neih a ni ang.

Workshop hmanpui tur hian state pawn leh chhunga mithiam thlanchhuah engemaw zat hman an ni ang.