Serchhip District Deputy Commissioner thar Pi Juhi Mukherjee IAS chuan vawiin chawhma dar 10:00 khan charge a la a, DC Charge la mek tu Pu Lalsangliana Additional DC in charge hi a hlan a ni.

Pi Juhi Mukherjee chuan Serchhip District-a DC a ni tur chu lawmawm a tih thu sawiin, sawrkar hnathawkte leh mipuite thawhpui ah a sawm a, thahnemngai taka District tana thawh a tum thu a sawi bawk.

Pu Lalsangliana MCS pawhin Pi Mukherjee chu Serchhip District-a IAS Officer DC ni hmasa ber anih thu hrilhin, District mipuite leh Zoram pumin amah atangin beisei an neih san thu a hrilh a, District hmasawnna tur chuan an thlawp tlat dawn thu a sawi bawk.

Pi Juhi Mukherjee hi kum 1982 a piang niin, kum 2007 batch IAS niin, IAS-a inziah tlin tum hian India ram pumah 10-na a ni pha a ni.

DC mawhphurhna a lak hnu hian Pi Juhi Mukherjee chuan Serchhip DC Office-a room hrang hrang tlawh kualin thawktute nen inhmelhriatna hun an hmang nghal bawk.