Printing & Stationery Minister Pu P.C. Zoram Sangliana chuan vawiin khan 12th Five Year Plan chhung atana a department enkawl Printing & Stationery in hmachhawp pawimawh zual a neih chungchangah department hotute nen meeting an nei a. 11th Five Year Plan chhunga he department in hma a lak hrang hrang leh a hmachhawp kalpui mekte 12th Five Year Plan chhunga chhawpchhuah tur an ngaih pawimawh zualte an thlir ho a ni.
Printing & Stationery changtu Secretary Pu Lalthankhuma leh officer pawimawh dangte chuan an thu ngaihpawimawh zawngte an chhawpchhuak a. Tarlan tawh angin Pu P.C. Zoram Sangliana hian nimin khan a department enkawl dang Art & Culture leh Transport department chungchangah hetiang meeting hi a lo neih pui tawh a ni.
12th Five Year Plan chhunga department hrang hrangin an hmachhawp thlirlawkna hun hi Chief Minister duh dan anga neih a ni a. Chief Minister chuan Minister hrang hrangte hnenah 11th Five Year Plan a an hnathawk leh 12th Five Year Plan atana inbuatsaih turin a thawhpuite a lo ngen tawh a. Ruahman lawk ang phei chuan Prime Minister hian December 29 velah 12th Five Year Plan thlir ho tur hian state tin Governor leh Chief Minister te chu National Development Council thukhawm turin a koh beisei a ni.
