Nimin chawhnu dar 4:00Pm khan cheng nuai Rs 58.91/-seng a sak, Saiha Tourist Lodge Annex Building thar chu Tourism Minister Pu S.Hiatoa’n Ribbon chep chat in a hawng. He Building thar hi Zopa chhiar in chhawng hnih a ni a, a chung leh hnuai ah Double bed room 4 ve ve awmin, Room 4 te chu VIP Room an ni. A chung atan Dyna Roof leh a chhuat atan a Ceremic Tile hman a ni a, a building hian 402.25 Sqm2 a zau hmun a awh a ni.

Tourist Lodge Annex Building thar hawnna inkhawm hi Tourist Lodge Banquet Hall-a neih niin, Parliamentary Secretary Pu H.Zothangliana’n a kaihruaia, Tourism Minister Pu S.Hiato chu Khuallian a ni.

Tourist Lodge Building thar hawnna inkhawmah hian thu sawiin khuallian Pu S.Hiato chuan mi state leh ram te angin hmanlai thil (historical monument ) leh mihring kut chhuak (Man-made) thil ropui tak tak khualzinmi te hiptu tur neih lo mah ila, khuanu kutchhuak kan ram leilung, a sik leh sa, a lui leh tlang leh ramngaw te bakah kan culture te hian khualzin tam tak kan hip thei a, kan hip mek bawk a ni ,a ti.

Minister chuan khualzin tam tak hip a, Tourism hlawhtlinpui tur chuan a ram leilung fa te hi rinawmna leh huaihawmna a kan inthuam hmasak a tul a, chu chu Tourism hlawhtlinpui tawh ram leh state te tih dan pawh a ni, a ti bawk. Minister chuan Palak dil , Chhimtuipui leh phawngpui tlang te avang hian Kolodyne Multi Model Project a lo pui tlin hunah phei chuan khualzin mi chi hrang hrang, Water Sports lama tui mite, Adventure lam a tui mite, tlanglawn mite leh eco-tourism lama tui mi khualzin tam tak Mizoram chhimlamah hian an lo la lut dawn a, chhimlam mi tan phei chuan Tourism hi kan sum hnar ber a la ni thuai dawn a ni, a ti. Sawizelin Pu S.Hiato chuan tun hnai mai pawh khan Switzerland atangin Chhimtuipui chu rafting tih nan a rem leh remloh lo zir in, Chhimtuipui chu Rafting tih nana lui tha ber pawl a ni thu an sawi a ni, a ti. Chuvangin Kolodyne Multi Model Project in khualzin tam tak Mizorama a rawn hruai luh tur te lo dawng sawng tur hian Tourism Department pawhin Tourist Lodge hmangin hmun tam tak ngawi kan dawh tawh a, kan la dawh mek zel a ni, Minister chuan a ti.

He hunah hian Saiha DC Pu Alok Swarup IAS, PU RT Zachono CEM, MADC leh Pu Hiphei Chairman , MADC te pawh in thutawi sawina hun an hmang.

Pu Vabeiha Hlychho, Director, Tourism Department in ‘vote of thanks’ a sawi zawh ah, College veng MTP Choir ten Closing Song sa in hawnna inkhawm hi an tin ta a ni.