1202/2023-2024

Siaha 20th July 2023: Vawiin khan Urban Development & Poverty Alleviation Department (UD&PA) kaltlang a Thosai khelmuala phullem (Artificial Football Turf) phah tur lungphum phumna inkhawm chu JNV Hall, Thosai ah neih a ni a, he hunah hian Home Minister Pu Lalchamliana chu khuallian niin lungphum phumna hi a nei.

Khuallian chuan Thosai khua leh Siaha District ten tangkai leh hlawk taka an hman atan lungphum a phum tih a sawi a. Sawrkarin thalaite hmakhua ngaiin infiamna lam hmasawnna turin theihtawp a chhuah thin tih sawiin Pu Lalchamliana chuan UD&PA kaltangin phullem 8 leh Sports Department hnuaiah phullem 20 chuang phah a nih tawh thu a tarlang a. Hmasawnna hian hun a mamawh thin a, mipuiten dawhthei tak nghah a ngaih chang a awm fo a ni tiin dawhthei taka Siaha mipuiten an lo nghah chu a tak hmuh theih tura phochhuah mek a ni, a ti. Zu leh ruihtheihthil in Mizoram thalaite a run mek a, nunna tam tak chan a ni tawh tih tarlangin thalaite ruihhlo laka chhanchhuak turin infiamna chu thilpawimawh tak ni a ahriat thu sawiin vawiina phullem phah tak pawh zawhfel a nih hun chuan nunna tamtak chhanhimtu a ni thei dawn a ti. Phullem phah hian thalaite chauh a huam lo a, vantlangin tangkai takin an chhawr dawn a, taksa hrisel neihna turin insawizawina hmun tha tak a ni dawn a ti bawk. Infiamna hmanraw tha siam hi sawrkarin a ngaipawimawh zel dawn tiin vawiina lungphum phum chu a bul tanna pawimawh tak pakhat a nih thu a sawi.

Home Minister chuan khawvel infiamna a Mizo tamzawk an chhuah theih nan bul tan hmat a tul tih sawiin, inrelbawlna tha leh changtlung zawk neih a ngai a, sawrkar pawhin theihtawp chhuahin Sports Department chu Industry-ah a puang hial a ni, a ti. Infiamna hian inthununtheihna a kentel tlat avangin infiammite chuan mahni taksa thununtheihna tha tak an nei thin a, chu chuan taksa hriselna leh damreina a keng tel a ni tiin Zoram mipuite chu infiamna leh taksa sawizawi kawngah tan la thar turin a ngen bawk a ni.

Pu Lalchamliana chuan covid hripui leng vangin Mizoram sawrkarin sum lamah harsatna tam tak a tawk tih tarlangin harsatna lian tak tawh a nih lai a hmasawnna kawng hrang hrang tam tak hmuh a ni chu lawmawm tiin sawrkarin mipuite a ngaihven zia tarlangtu pawimawh tak a ni, a ti.

Siaha District atanga infiamna lama Mizoram tihmingthatu an lo chhuak fo chu fakawm a tih thu a sawi a. Thalai infiammite fuihphur leh tanpuina kawngah Siaha khawtlang mipuiten theihtawp an chhuah thin chu lawmawm a tih thu tarlangin infiammite tawiawm zel turin a chah a. Siaha khawtlangin Infiamna hmunhma thatak an neih theihnan Contractor te chu uluk leh tha taka hnathawk tura chahin, Siaha mipuite pawh hnathawktute vil kawngah thahnem ngai taka penchhuak zel turin a sawm nghal bawk.

Pu C.Malsawma, E.E. UD&PA chuan Technical Report pein phullem phahna tur hi SEDP atangin Cheng nuai 395.53 hmuh niin contractor atan Gallan Sports & Infra Pvt. Ltd-te thlan an ni a ti a. Phullem phah tur zau zawng hi a dung 95 m leh a vang 55 m niin tuipaihna (drainage) leh a hungna (fencing) tha tak a awm tur thu tarlangin hnathawh hi kumin chhung ngei a zawh tum anih thu a sawi.

Vawiin lungphum phumna inkhawm hi Pu Lalhmunsanga Hnamte, DC Siaha chuan kaihruaiin Pu T. Seido, EM Sports, MADC, Pu HC.Lalmalsawma Zasai, MDC leh Pu V.T. Martin Vabeiduakhei , President, SDFA, Siaha ten thawsawi tawi neiin Pi B. Malsawmtluangi, DPO, Siaha chuan lawmthu sawina in hun a khar ani.

Home Minister Pu Lalchamliana hian tukin zing dar 9 khan Circuit House, Siaha lo thlengin, Deputy Commissioner, Superintendent of Police,  Department hotute  bakah Mara Autonomous District Council- a E.M. leh MDC ten an lo hmuak a. Home Minister hi Pu Vanlalchhuanga, Principal Secretary, Taxation Department, Pu John Neihlaia IGP, Pu R. Zosiamliana, Commissioner of State Tax leh Official dangten an rawn tawiawm a ni.