1201/2023-2024

Aizawl, 20^th July, 2023 : Animal Husbandry & Veterinary Department leh Mizoram Entrepreneurs’ Forum te tangkawpin an buatsaih 'Vetpreneur Business Plan Competition 2023' kharna leh lawmman semna hun chu vawiin khan Synod Conference Centre, Mission Vengah neih a ni a. AH&Vety minister Er. Lalrinawma chuan khuallian niin a hmanpui a, Veterinary & Fisheries Development Board Vice-Chairman Pu C. Lalmuanpuia chu khualzahawm a ni.

He hunah hian khuallian Er. Lalrinawma chuan thu sawiin Vety department in ran vulhtute tan tunhma chuan small scale zawng leh subsidy ang zawngin hma kan la nasa a, hei hian kan beisei angin awmzia a nei tawk lo nia hriat a nih avangin state sawrkar leh sawrkar laipui pawhin ngaihtuahna thar sengin a ki kan thlak ta a. Tun hnai atang chuan entrepreneurship hawi zawngin kan programme hrang hrangte hi kan her chho hret hret a, tunah pawh National Livelstock Mission hnuaiah Vetpreneur Business Plan Competition te pawh kan buatsaih ta a ni a. Hei hi kan bul tanna pawimawh tak pakhat a ni a, hei hian kan ram economy chawilanna kawngah pawh awmzia thui tak a neih ka beisei a ni a ti a. Ranvulh leh a kaihhnawih livestock, value chain, milk processing, meat processing etc. lama inhmnamhnawihte dawm kana chawi kan hi kan tum ber a ni a. Ran damlo enkawlte, rang taka hri danna pek te, hri leng tur vente, mihring leh ran atanga natna inkaichhawn theih tihrem te hi kan ngaihpawimawh a ni a ti.

Khuallian chuan Animal Husbandry hi kan economy puitu pawimawh ber te zinga mi a nih avangin hma kan sawn zel a pawimawh a, thalai lehkhathiam leh a ngaihna hre tak tak ten helam ngai pawimawha Animal Husbandry lama entrepreneurship an kalpui ka hmuh hian ka lawm takzet a, kan thalai a ngaihna hria te nen kan tan tlan phawt chuan reiloteah sa leh artuiah kan intodeloh ngei ngei ka ring a ni a ti a. Vety department chhinchhiah danin kum kalta khan phai atangin bawnghnute litre nuai 137 a lo lut a,ar puahsa metric ton 1030, artui pum nuai 373 lai a lo lut a, heng zawng zawng leina atana ram pawna Mizoram mipuite sum luang chhuak hi  cheng nuai 20000 chuang a ni. Heti taka kan indaihloh a, ram pawn atanga kan lakluh nasat em em lai hian kan local farmer thenkhat chuan an tharchhuah hralhna kawngah harsatna an tawk a. Hei hian kan mithiamte leh entrepreneur te pawimawhna a tilang chiang em em a ni a ti a. Competition a san tawh avangin tunhma a ran vulh satliah ngawt ang khan awmzia a nei thui tawh lova, awmze nei zawk a kan kal a ngai a, management leh marketing thlengin, digital world kan hma tangkai thiam atul a ni a ti bawk.

Khual zahawm Pu C. Lalmuanpuia pawhin ran vulh leh a kaihhnawih lama hma kan sawn lehzulna tur atana 'Vetpreneur Business Plan Competition buatsaih a ni chu lawmawm a tih thu sawiin, he competitona tel te leh a hma a lo tel tawh te chanchin leh hlawhtlinna a hriatin thlamuanthlak a tih thu a sawi a, Mizo thalaite rilru lo chak zia leh an tumruh zia he competition hian a tarlang tih sawiin Mizoram mai bakah Mizoram pawn leh India ram pawn thlenga hlawhtlinna an hmuh theih nan duhsakna a hlan a ni.

He competition ah hian topic pali - Meat processing, Milk processing, Livestock Value Chain leh Veterinary Service Delivery hmangin District hrang hrang atangin mi 49 ten business plan thehlutin, screening leh interview kaltlangin lawmman dawngtu te thlanchhuah an ni.

'Vetpreneur Business Plan Competition 2023' a lawmman dawngtute chu :

Pakhatna – Dr Freddy H. Siamthara, “Vetmiss”, Upper Kanaan, Aizawl

Pahnihna – Winkle Laltlanchhunga, “Trinity Organic Farm”, Upper Kanaan, Aizawl

Pathumna – Dr Angela L. Renthlei, “GR Foods”, Pema Colony, Chaltlang

Consolation prize mi panga in an dawng a, chungte chu :

1.     Dr Lalhmangaihsanga, “Tawlhloh”, Mission Veng, Aizawl

2.     S. Vanlalhriata, “INEXT System”, Zarkawt, Aizawl

3.     Esther Khiangte, “ELK Protein Snacks”, Ramhlun North, Aizawl

4.     Lalrinngheti, “ESPR Creative Lab Pvt. Ltd.”, Zarkawt, Aizawl

5.     Lalrinpuii Hmar, “Blue Montis”, Leitan South, Aizawl

Pakhatna hian cheng nuaithum, pahnihna in cheng nuai 2 leh pathumna in cheng nuaikhat an dawng a, mi panga in consolation prize cheng singkhat theuh an dawng bawk. An zavai hian chawimawina thuziak leh thilpek hlan an ni bawk.

Lawmman semna hunah hian Vetpreneurship lama mi hlawhtlingte:

1.        Chhimphei Women Poultry Producer Company Ltd.

2.        Eimi Foods.

3.        Anna Food Production.

4.        RTS Hatchery

te hnenah Vetpreneur Special Award hian an ni a, an hmalakna video clip thlirho a ni bawk.

'Vetpreneur Business Plan Competition 2023' lawmman semna inkhawm hi Dr C. Lalrintluanga, Addl. Director, AH & Vety department in a kaihruai a, Dr Lalrinpuii Sailo, Director, AH & Vety department in keynote a dress pe in, Pu Lalawmpuia Khiangte, President, Mizoram Entrepreneurs’ Forum leh Dr James LT Thanga, espert member ten thu an sawi a. Dr Zohlimpuia, VO (DI & S), AH & Vety department in technical report pe in, Dr RL Tanpuii, Joint Director (LD&B), AH & Vety department in lawmthu sawina in hnu a khar a ni.