Home, Rural Development, etc. changtu Minister Pu R. Lalzirliana chuan vawiin khan Vairengte-a Market Building, Police Station Grade IV leh Police Quarter Type II sak hna kal mekte chu a hmunah tlawh in a enfiah. Hemi rual hian Model Organic Farm, Thingdawl ami chu a tlawh bawk. Minister hi Kolasib DC Pu H. Lalengmawia leh SP Pu C. Lalzahngoa bakah officer dangten an tawiawm a ni.

Minister Pu R. Lalzirliana chuan hna sak mekte chu tha thawkhat viaua a hriat thu leh, khaw mipui pawhin thawktute an tawiawm tha hlea a hriat thu a sawi a. A hun taka hna hi thawh zawh theih chu duhthusam ni mahse harsatna hrang hrang vanga theihloh chang a awm thei a. Chutichung chuan mipui mamawhna hre reng chunga chak takin quality tha tak si in hna thawk zawm turin contractor te chu a chah a ni.

NLCPR atanga sum hmuh cheng nuai 337.7-a Vairengte Market Building sak hna hi November 2015 khan hna a ni a. Block pathum (bazaar, multipurpose hall leh staircase) a then niin, metre 1291.67 bial a zau a ni a. Tun dinhmunah hian hna 50% chu thawh zawh tawh a ni.

Unit 4 awmna tur Police Quarter Type II hi October, 2015 khan sak tan niin, 54% zawh tawh a ni a. A sak nan hian cheng nuai 71.1 sanction a ni. Police Station Grade IV sakna atan hian cheng nuai 153.6 dahthat niin, March 2016 khan sak tan a ni a. Chhawng 4 awm tura duan niin, tunah hna 4% zawh tawh a ni.