No.1580/2021-2022

Kolasib dated 27th July 2021: Vawiin chawhma khan Pu Lalchamliana, Home Minister chuan ni 26, July 2021-a Assam Police-ten Mizoram ramria IR duty-na hnehchhuh an tumna hmun, Vairengte Autorickshaw stand bul a tlawh.

Home Minister Pu Lalchamliana chuan ramri buaina chu tharum tel lova chinfel tum mek laiin Assam Police-te chetna avangin lohtheih lova tharum nen chhanlet a ngaih phah tak thu sawiin Assam lam ah nunna hial chan an awm phah chu pawi a tih thu a sawi. Assam Police rawn luh tumna hmun thenkhat Saihapui ‘V’, Aitlang leh Zophaiahte chuan Mizoram Police a tul anga dah zel an nih thu leh Saihapui ’V’ khawtlang hruaituten vawiina an lo thlen angin Police dah belh nghal a nih thu a sawi a. Ramri buaina chungchangah Vairengte khawtlang mipuite inpekna leh huaisenna chu fakawm a tih thu a sawi bawk a ni.

Supply Minister Pu K.Lalrinliana pawhin Assam nen a ramri buaina avangin ei leh bar,LPG leh POL-a harsatna a awm loh nan ruahmanna hrang hrang a awm thu a sawi a, Mizoram Sawrkar Godown-ah mipui thla hnih ei daih awm mek tur a ngaih a nih thu a tarlang bawk a ni.

Ramri a ralmuanna a awm theih nana CRPF dah ten, Mizoram lo lut a IR Camp luahlan tum Assam Police-te chetna lakah hmalakna hmuh tur a awm loh thu sawi a ni a, hemi chungchangah hian Pu Sarbjit Singh, IG, CRPF pawh hma la tur a hrilh nghal a ni.
Home Minister leh a tawiawmtu Minister leh MLA-te hian ramri buaina chungchanga a tul apiang a hman turin Vairengte khawtlang hruaitute hnenah sumfai an hlan a, hemi rual hian Sports Minister Pu Robert Romawia Royte chuan silpaulin bundle khat a hlan nghal bawk a ni.

He hunah hian Pu K.Lalrinliana, Minister of State, Food, Civil Supplies and Consumer Affairs Department, Pu Lalchhandama Ralte, Minister of State for School Education Department, Pu Lalruatkima, Minister of State for Rural Development Department, Pu Robert Romawia Royte, Minister of State for Sports and Youth Services, Pu Lalrinsanga Ralte, MLA, Er.H.Lalzirliana, MLA, Pu C.Lalmuanpuia, MLA, Pu John Neihlaia, IGP leh Police Department-a hotu dangte an tel bawk a ni.