Vawiin chawhma khan Vanapa Hall-ah Home Minister Pu R.Lalzirliana chuan Govt. Zirtiri Residential Science College in an college atanga zirchhuak te thlahna leh zirlai rawn lut tharte lawmluhna hun a buatsaih a hmanpui a. He hunah hian Govt. Zirtiri Residential Science College atanga  Mizoram University Examination a Gold Medal dawngtute leh rank holder-te hnenah chawimawina hlan a ni. 

Govt. Zirtiri Residential Science College(GZRSC) zirlaite programme a fuihna thu sawitu, Home Minister Pu R.Lalzirliana chuan zirlaite tana hlawhtlinna kawng nia a hriat te a sawi a. Hlawhtling tura thuawihna, tawrhchhelna, hun vawndik, taihmakna leh nun uluk pawimawhzia te ama hun tawn tawh atangin zirlaite chu a kawhhmuh a.   A hun tawn tawh a  a hlawhtlinna te leh tun dinhmun a thlen theihna chu Pathian a a innghah tlat thin vang  leh ama hringtu-nu thu a awih thin vang a nih thu sawiin zirlaite chuan malsawmna te, vanneihna te  dawng turin   Pathian a innghat tlat chunga an nu leh pa te thu an zawm hmasak a ngai a ni a ti. 

Home Minister chuan eng hna thawk tur atan pawh mithiam bik mamawh vek a nih tawh thu a sawi a. Eizawnna kawng dap tur emaw sawrkar leh company-te a hna hmu tur chuan result neih that mai bakah thiamna tak tak neih tel a ngai tawh a ti a. Pass satliah tan chuan beisei tur a vang tawh hle a ni a ti. Pu R.Lalzirliana chuan Mizo thalaite chu  zirlai an nihchhung pawhin zirna kawng ringawt piah lamah Mizo nunmawi chhawmnun zel kawngah mawhphurhna pawimawh tak an neitute an ni a ti a. Chhiatni thatni, thlanlaih nikhua leh tlawmngaih chhuah  hunah te  Mizo thalai tan chuan mawngzang ber nih theih zel chu thilmawihnai a la nih reng thu a sawi a. "Ruihtheih thil awmna hmuna ruihtheih thil ti lo ngam, eiruktheihna hmuna eiru lo ngam leh thlemna kara rinawm thei nih hi zirlai leh Mizo thalaite kan nih anga  kan tum tlat tur a ni"  a ti. 

GZRSC  hi  kum 1980 August ni 1 khan hmeichhiate chauh luhna, Zirtiri Women College tih a din a ni a; kum 2000 June Ni 28 atang khan Science college ah leh a ni a. GZRSC  Principal Pu Laltanpuia sawi dan chuan tun dinhmunah GZRSC ah hian science  zirlai 580 an awm mek a. Heng zinga 270 hi lutthar niin GZRSC-ah hian Life Science, Physical Science leh Home Science zirtir a ni a. Zirtirtu thawk nghet mi 40 leh Zirtirtu la thawknghetlo mi 17 awm mekin  campus kumhlun tur Durtlanga insawn tura hmalak mek a ni. 

GZRSC   Freshers' Social cum Farewell to Graduates programme ah hian GZRSC  Annual Magazine 'Senhri' tlangzarhna neih a ni a. He College in  Home Science subject-a tithaber  hnena lawmman a hlan thin, Cheng sangnga leh chawimawna thuziak kengtel, Lalziki Special Award chu Zothanpuii Pautu hnenah hlan a ni a. An zirlai tithazual pahnih  MZU gold medal dawngtute - Samuel Lachhanhima(Physics Department) leh Zothanpui Pautu(Home Science) te hnenah chawimawina hlan a ni a. GZRSC atanga MZU Examination Rank holder-te zawng zawng pawh chawimawina thuziak hlan an ni.