3086/2023-2024

Khawzawl, 18th December 2023: Vawiin khan Home Minister Pu K. Sapdanga leh Excise Minister Pu Lalnghinglova Hmar te chuan Khawzawl an tlawh a. An pual hian 2nd IR Battalion hmunpui Khawzawl Lungvarah inkhawm tawi hman a ni.

He hunah hian thu sawiin Pu K. Sapdanga chuan Home Minister a nih hnua official-a Batallion hmunpui a tlawh hmasak ber - 2nd IR, Khawzawl a tlawh thei chu lawmawm a tih thu a sawi a. Mizoram sawrkar thar chuan khawtlang muanna leh mipuite thlamuanna a ngaipawimawh a ni, a ti.

Pu K. Sapdanga chuan tlawmngai pawl te nena thawkhovin ram ralmuang, dan leh thupek tha taka kenkawhna siam theih sawrkarin a beisei thu a sawi a; sawrkar hnathawk, tlawmngai pawl hruaitute he mi kawngah hian thawhpui a sawm nghal a ni.

Home Minister hian Krismas leh Kumthara Police Duty te tanpui nan 2nd IR Battalion leh Khawzawl SP Office te hnenah cheng ₹10,000 ve ve a hlan nghal bawk.

Excise Minister Pu Lalnghinglova Hmar pawhin thu sawiin ruihhlo dona kawngah Mizoram mipuite tanrual a ngaih tak zet thu a sawi a. Mizoram sawrkarin ruihhlo do a ngaihpawimawh thu sawiin, 9th Mizoram Legislative Assembly thutkhawm hmasak berah Governor leh Chief Minister te pawhin an sawi chhuah thu a tarlang. Mizoramin kawng tam takah hmasawnna hmu mah se, a chhawrtu tur thalaite ruihhlo vanga hnathawk thei lova an awm chuan hmasawnna chuan awmzia a nei dawn lo a ni, a ti a. Ruihhlo dona kawngah sawrkar, tlawmngai pawl leh kohhran hruaitute chak leh zuala an thawhho a ngai a ni tiin Mizoram mipuite chu ruihhlo do kawngah thawhho puiah a sawm.

Inkhawm hi Khawzawl Bawrhsap Pu K. Lalrohlua’n a kaihruai a, 2nd IR Battalion Commandant Pu Saidingliana Sailo in inlawmna thu a sawi. Home Minister leh Excise Minister te hi Pu Thomas Zodingliana, DIG (Eastern Range),  Pu David H. Lalthangliana OSD   (Home) leh Pu Z. Lalhmangaiha, Jt. Commissioner (Excise) ten an tawiawm a ni.