3154/2023-2024

2023 Pawltlak thla ni 21:  Vawiin khan Mizoram Home Minister Pu K. Sapdanga chuan Kolasib District tlawhin, sawrkar official-te leh NGO hrang hrangte nen inkawm hona hun a buatsaih bakah, District chhunga ramri venbuk, border outpost hrang hrang a tlawh kual bawk.

Home Minister Pu K. Sapdanga hi Mizoram Legislative Assembly Deputy Speaker Pu Lalfamkima bakah, Home Department Commissioner & Secretary Pu H. Lalengmawia, Deputy Inspector General of Police (Armed) Pu C. Lalnunmawia leh Home Department Joint Secretary Pu Lalthiamsanga Sailo te'n an ṭawiawm a. Kolasib District Bawrhsap Pu John LT Sanga hovin Kolasib District chhunga sawrkar official-te leh tlawmngai pawl hruaitute'n an lo dawngsawng a ni.

Kolasib Bawrhsap Pu John LT Sanga kaihhruaia Circuit House, Banglakawn, Kolasib-a inkawm hona buatsaihah Home Minister Pu K. Sapdanga chuan sawrkar thar siam tura ring tawka thlang tlingtu ram mipuite chungah lawm thu sawiin, kalphung thar, mipui sawrkar din turin mipuite ṭawiawmna leh thawhpuina an mamawh dawn tih a sawi a. Sawrkar tharah Home Department-in ramri hrula hna bul ṭan tura ruahmanna siamin, Champhai District-ah bul ṭanin, Kolasib District leh Mamit District lamah chhunzawm zui mek a ni, a ti a. Ram pawn aṭanga thil ṭha tam tak lo lut karah ṭhalai tam tak suattu ruihhlo lo lut telin, ruihhlo lo lut tur venga tirem turin ramri-ah venhimna ṭha taka kalpui a ṭul tih a sawi a. Ruihhlo chu Home Department hnuaia thawkte ngawt tan chuan do zawh ngaihna a awm lo va, mipuite thawhpuina a pawimawh a ni tiin, Home Department chuan lamṭangah mipuite a sawm a, lungrual taka kan thawh ho chuan nunna suattu ruihhlo hi kan hneh thei ngei ang, a ti.

Home Minister chuan ramri hmun 13 laiah ram venghim turin police te an duty a, an dinhmun hautakzia leh harsatzia sawrkarin hriain, vawilehkhatah thuam ṭhat nghal bur bur theih ni lo mah se, an dinhmun hre chiang lehzual turin a hmunhma hmuh hmasak a ṭul an tih thu a sawi a. Assam nena kan inrina leh Tripura nena kan inrina thlengin kan ralvengtute tlawh kual hi hna hmasaah kan neih a ni, a ti.

Ṭhenawmte nena kan inkal pawhna kawngpui dungah Mizoram tihmingṭha theitu leh tihmingchhe theitu tam tak a awm tih sawiin, Home Minister chuan ramri hrula kan chet danah hnam hmel timawi lo thei a awm em tih leh sawrkar ang pawhin kan tihawm loh tak tih kan lo nei palh em tih te inenfiah a ṭul a ni, a ti a. Chuti ang a lo awm palh a nih chuan titawp tur leh ching zui lo tura ram mipuite kan ṭan ho a pawimawh dawn a ni, a ti.

Home Minister Pu K. Sapdanga chuan sawrkar an kalpui danah tlema kalphung danglam leh kalphung thar deuh a awm a nih pawha theih tawpa sawrkar ṭawiawm turin mipuite a ngen a. Sawrkara mawhphurtu leh sawrkar tichaka timawitu chu sawrkar hna thawkte an nih thu sawiin, sawrkar hna thawkte chu ṭha taka sawrkar kaihruaia ṭawiawm turin a sawm a. Ram dangin an awh em em kohhran leh tlawmngai pawl kan nei hi Mizoram kan vanneihna a ni tiin, ram siamna leh ṭhalaite nun chhanna kawngah kohhran leh tlawmngai pawlte chungah beiseina sang tak an neih thu a sawi a. Ramin hma a sawn theihna tur leh ram mipuite'n ngaihtuahna dik lehzual an neih theih nana kaihruai turin media-te an pawimawh hle tih sawiin, chumi kawnga theih tawp chhuahpui turin media-te a sawm bawk a ni.

He inkawm hona hunah hian Deputy Speaker Pu Lalfamkima leh Home Commissioner Pu H. Lalengmawia te pawhin thu an sawi a. Sawrkar official-te leh tlawmngai pawl leh kohhran hruaitu kal khawmte nen thil pawimawh hrang hrang sawi ho chhunzawm a ni.

Circuit House-a inkawm hona hun hman zawh Home Minister hian Kolasib District huam chhunga Border Outpost pasarih - Saiphai, Saihapui V, Buarchep, Vairengte Auto Stand, Aitlang, Phaisen leh Zophai BOP-te a tlawh kual nghal a. BOP-a sipai duty-te dinhmun enfiahin, an harsatna leh mamawhte a sawipui a. Department hotute nen BOP thuam ṭhat dan tur leh ramria hma lakna tur hrang hrang an thlir ho bawk.

Home Minister Pu K. Sapdanga chuan ramri chungchanga Mizoram sawrkar dinna chu a la ngai reng a, BEFR 1875 a ni tih sawiin, ramri chungchang buaipuitu tur Boundary Committee din thuai an tum thu leh Boundary Committee rawtna leh thurawn ang zelin ramri chungchangah chuan sawrkarin ngaihtuahna a seng dawn tih a sawi a. Ram leh hnam himna atana nunna thapa duty sipaite a chhuang takmeuh tih sawiin, an hna thawh avanga Mizoramin boruak muanawm tak kan nei thei hi a lawmawm tak zet a ni, a ti a. Ramria duty sipaite chu hmun khawharthlak takah ram leh hnam him nan rinawm taka an duty avangin lawm thu hrilhin, ram himna atana thawktute chu a theih ang anga thuam chak zel an tum dawn tih a sawi a. Ramria duty-te chu ram tan theih tawp chhuah chhunzawm zel tura chahin, ramri depa awm khuate pawh sawrkar tha tichak a, theih tawp chhuahpui turin a sawm nghal a ni.

Home Minister hian ramria duty sipaite chu Krismas chibai bukin, Krismas hlim taka an hman theih nan Krismas thilpek sumfai a hlan bawk.

Home Minister hian Kolasib Circuit House-a inkawm hona hun buatsaih hmain Kolasib Project Venga MJA Press Club & office building chu tlawh hmasain, MJA Kolasib District member-te nen inkawm hona hun an hmang a. Kolasib District chhunga BOP a tlawh kual zawh hnu hian amah ṭawiawmtute nen Mamit panin Kolasib District hi an chhuahsan leh nghal a ni.