2226/2024-2025

Champhai, 26th September 2024: Vawiin khan Home Minister Pu K. Sapdanga chuan Mizo Zirlai Pawl Assembly vawi 68-na, hun ngana Thanghlianga Sailo Run, Champhai Tlangsama neih chu khuallian niin a hmanpui a. Pu Lalmuanpuia Punte, Adviser to CM (Political) pawhin he hun hi a telpui a ni.

He hunah hian Pu K. Sapdanga chuan Mizo Zirlai Pawl Assembly a hmanpui thei chu a lawm thu a sawi a. Champhai MZP Sub Headquarters-ah Vice President anih ṭhin thu leh kum 1985-a MZP dinthar a nih khan, Zirlai Pawl thlazar hnuaiah Zoramin Remna a neih theih nan hruaitute hnung an lo zui ve ṭhin tih a sawi. Khuallian hian MZP chu zirlaite chhertu, zirlaite hma ngaia an hmakhua su kaw tu tur a nihna vawng reng turin kalkhawmte chu a chah a ni.

Home Minister hian Mizoram leh hnam humhalh a pawimawh thu sawiin, Mizoram run mektu ruihhlo laka fihlim turin zirlaite chu a chah a. Mizo mipa te suattu ruihhlo dona kawngah ṭanrual a ṭul tak zet a ni, a ti. Zirlaite chu “Kan lehkha zir hian hlawhtlinna a phur chhuak zo em?” tih inzawt fo tur leh hnam dang te tihtheih chu theih ve tum turin a fuih a. Ram leh hnam humhalh nan zirna ngaih pawimawh leh ruihhlo do chu hna hmasaah neih a ngai a ni, a ti.

Pu K. Sapdanga chuan Mizoram sawrkarin flagship programme - ‘Ban a kaih’ hmangin ṭhalai taima, mahni intodelh tum te tan kawng a hawng mek tih a sawi a. Ti tak tak peih te dawm kan a, kawng hawn sak hi sawrkar tum ber a ni, a ti. Ram leh hnam humhalhna kawng pawimawh chu taimakna leh thawhrimna a ni tih hre reng turin zirlaite chu a chah bawk a ni.

Mizo Zirlai Pawl Assembly vawi 68-na hun ngana hi Pu Zairemthanga, Treasurer, MZP General Headquarters chuan a kaihruai a. Pu C. Lalrokhuma, Adviser hnen atangin Assembly thupui - ‘Ram leh hnam tan - Mizo Zirlaite’ sawizauna ngaihthlak a ni a. General Headquarters report, Headquarters Report leh Hnam Pual Zirlai Pawl te hnen atangin thu sawi ngaihthlak a ni.