3111/2023-2024

Champhai, 19th December 2023: Vawiin khan Home Minister Pu K. Sapdanga chuan Zokhawthar a tlawh a, Excise & Narcotics Minister Pu Lalnghinglova Hmar leh Champhai South bialtu MLA Lt. Col. Clement Lalhmingthanga ten an tawiawm. Home Minister-te pual hian inkhawm tawi Zokhawthar YMA Hall-ah hman a ni a, he mi hnu hian Land Custom Station, Immigration Checkpost bakah Lipui leh Bethel Refugee Camp te an tlawh nghal a ni.

Pu K. Sapdanga chuan Zokhawthar khawtlang hruaitu ten an lo dawnsawnnaah lawmthu a sawi a. Sawrkar thar chuan hun reilote chauh pisa la luah mah se, Mizoram mipui ten hunpui thlamuang leh ralmuang taka an hman theih an duh avangin ruihhlo lo luh thinna kawng pakhat - Mizoram khawchhak lam tlawh chu ngaihpawimawh hmasakah an nei a ni, a ti a. Zokhawthar chu Border Trade hmunpui, mipui mamawh bungraw pawimawh tak tak te luhkhawmna anih angin an hun neih chhun te hlawkthlak thei ang bera hman ho a duh thu Home Minister hian a sawi bawk.

24-Champhai South (ST) AC bialtu Lt. Col Clement Lalhmingthanga pawhin he hunah hian thu sawiin Zokhawthar chu India ram luhka pawimawh tak anih angin, Mizoram hmel lanna darthlalang pawimawh tak a ni, a ti a. Home Minister leh Excise Minister ten Zokhawthar an tlawh chuan khaw hmasawnna kawngah rah tha a chhuah ngei a beisei thu a sawi bawk.

Inkhawm hi Zokhawthar VCP Pu Lalmuanpuia’n a kaihruai a, inkhawm zawhah Home Minister, Excise Minister leh bialtu MLA te hian Zokhawthar khawtlang hruaitute nen inkawmna hlawkthlak tak an nei.

Vantlang inkhawm neih zawh hian Home Minister te hian Land Custom Station leh Immigration Checkpost te an tlawh a, Official te nen inkawmna hun tawi neiin, Pu K. Sapdanga chuan Mizoram sawrkar chuan ramriah insumdawnna kalphung mumal zawk neih a duh thu sawiin, he mi kawngah hian hmasawnna a awm chhoh zel a beisei thu a sawi. Pu Lalnghinglova Hmar leh Lt. Col Clement Lalhmingthanga te pawhin he hunah hian thu an sawi a ni.

Commerce & Industries Department report-a tarlan danin Zokhawthar Land Custom Station hi March 15, 2015 khan khatih hunlaia Ministry of Commerce & Industries changtu Union Minister of State Pi Nirmala Sitharaman-in a hawng a, tun dinhmunah Custom Department-in thutchilhin, Special Assistance to State for Capital Infrastructure (SASCI) sum cheng vaibelchhe 15 hmangin tihchangtlun hna thawh mek a ni a. Tiau lui kanna lei (bridge) tihchangtlunna tur project cheng vaibelchhe 14.5 senna tur pawh Mizoram sawrkarin Ministry of External Affairs pawmpui turin a thehlut tawh a ni.

Land Custom Station-a hun a hman zawhah Home Minister hian Lipui leh Bethel Refugee Camp te a tlawh a, hunpui hlim taka an hman theih nan Home Department aiawhin tanpuina a hlan. Tun dinhmunah hian Bethel leh Lipui Refugee Camp-ah hian raltlan mi 1093 an awm mek a ni.

Home Minister hi DIG (Eastern Range) Pu Thomas Zodingliana, Champhai DC Pu James Lalrinchhana, Champhai SP Pu Vineet Kumar, Excise & Narcotics Jt. Commissioner Pu Z. Lalhmangaiha leh official dang ten an tawiawm a ni.