4136/2025-2026

AIZAWL; the 23^rd January, 2026: Vawiin khan 3rd Battalion M.A.P Roll Call Ground-ah Women & Child Development leh 3rd Battalion M.A.P te buatsaihin National Girl Child Day lawmna hun hman a ni a. National Girl Child Day hi kumtin January 24-ah lawm thin a ni a, kumin hian Inrinni anih avangin, a hma ni, January 23 ah lawm a ni ta a ni. He hun hi Pu K. Sapdanga, Hon’ble Minister, Home Minister chuan Khuallian niin a hman pui a, Pi Zonunthari, Joint Secretary, SW,WCD chuan Chairperson niin he programme hi a kaihruai a ni.

Vawiin hun hmanah thu sawiin Pu Sapa chuan hmeichhe naupangte field hrang hrang atanga chawimawi dawng thei an awm a, an tana lawmpuina thuchah sawina hun a nei thei chu lawmawm a tih thu sawiin vawiin programme in a rahchhuah tura a duhthusam chu department hrang hrangte inzawmna tihchak ni sela, hmeichhe naupangte tana hmun him siam a, hmeichhe naupang tinte, engang dinhmun atanga lo kal pawh nise, inthliarna awm lova an lo than len theihna tur leh an kalna apianga kai hruaitu ni thei tura hun remchang siam sak theih ni se, a duh thu a sawi a ni. Ram leh hnam humhim tura Police–a lut turin a sawm a ni.

Inkhawm tanna atan Mizoram Bal Bhavan Society naupangte’n hla an rem a, hemi zawhah hian Chairperson Pi Lalzarmawii IAS chuan kalkhawmte lawmna thu sawiin, hmeichhe naupangte pawimawhna bakah kumin thupui atana ruat ‘Men-streaming’– hmeichhe naupangte leh hmeichhiate hmasawnna kawnga mipate pawimawhna te a sawi a, thupui nena inmil taka 3rd Bn MAP te’n inhawng taka an lo thawhpui avangin lawmthu a sawi nghal bawk a ni. Hemi hnu hian Pi Zoramthangi Chhangte, Director, Women & Child Development pawhin thu sawiin, National Girl Child Day chu Department tana Ni pawimawh tak a nih thu leh mipa leh hmeichhe intluk tlan lohna nasa lutukin chhungkua, khawtlang leh ram tana hmasawnna tur a tih thuan awp theih dan te tarlangin Lehkha zirna kawngah leh inchhung khura hmeichhiate tihduhdahna thleng thin chungchang thleng pawhin nghawng a neih thu te sawiin Women Helpline hian kan call dawn tam ber chu Domestic Violence chungchang niin heng case kan dawn changa tha taka min lo buaipui sak thin tu Women Police Station a lo awm hlauh te hi a vanneihthlak em em a. vawiin hun kan hman hian hmasawnna tha zawk kan chhawp chhuah theihna tur kawng rawn hawng zel se tih hi duhthusam a ni a. Vawiin hian National Girl Child Day hmang tura rawn kal khawm zawng zawngte hian kan Mizo hmeichhe naupangte humhim, chakna leh chawisang turin inpe deuh deuh zel ang u, tiin kalkhawm te a sawm a ni.

 Pu Ruatsanga Ralte MPS, Commandant 3rd Bn MAP pawhin thu sawiin, National Girl Child Day kan hman hian, kan thupui nena inmil in, kan khawtlang nunphung tha lo dodalna kawngah mipa te chanvo pawimawh tak hi in ngaihtuah turin ka chah duh che u in ka sawm duh bawk che u a ni, tiin kalkhawmte a chah a. Zaithiam Ruatpuii chuan BBBP Theme Song sa in kalkhawmte a awi a, National Girl Child Day puala Thutiam chhiar rualna neiin Pi Lalrammawii Kawilam Asst Director, WCD- in a kaihruai a, hemi zawh hian Hmeichhe naupang kawng hrang hranga hlawhtlinna, khawvel huap leh ram pum huapa langpha te chawimawina hun hman a ni a, an vaiin hmeichhe naupang 22 hnenah chawimawina hlan niin, Sports lamah te, zai lamah leh lehkhabu ziak lama midangte hma hruaitu te an ni.

Esther Hnamte, PM Rashtriya Bal Puraskar Awardee 2025 chuan zaiin mipuite a awi leh a, hemi zawh hian Pi Sailopari Joint Director, WCD chuan ram pum huapa lang pha hmeichhe naupang leh an chhungte hnenah an kal zelna tur atana duhsakna hlan nawn lehin an hun hlu tak seng a lo kalkhawmte hnena lawmthu sawi in hun a khar ta a ni. Hemi zawhah hian 3rd Battalion M.A.P Band Party te chuan kalkhawmte chu National Anthem hmangin an thlah a ni.

WCD a female perfomance 2025 thehluh (4).docx