369/2025-2026

Aizawl dated 29th April 2025: Vawiin chawhma khan Vanapa Hall, Aizawla Mizoram Upa Pawl General Assembly Vawi 50-na chu Home Minister Pu K.Sapdanga'n khuallian niin a hmanpui a. Pu Nghaklianmawia, President, MUP chuan hun a kaihruai a, MUP member mi 1,804 boralte sunna hun hman a ni.

Home Minister Pu K.Sapdanga chuan kum upa, tawnhriat ngah tawh tak takte chu mizo khawtlangah an hlu hle tih sawiin thangthar ten heng kan ro hlu te hlut thiam leh zah thiam hi kan mawhphurhna pawimawh tak a nih thu a sawi a. Kum lam a upa, tawnhriat ngah tak takte intelkhawmna pawl, MUP din a nih atang hian khawtlang leh ram inkaihhruaina ah an thawhhlawk tih sawiin an upatpuite harsatna sutkianna kawngah pawh pawl tangkai leh pawimawh tak an nih thu a sawi. Home Minister chuan MUP chu mizo nun ze mawi, khawtlanga nungchang mawi, tlawmngaihna chawinunna kawngahte leh aia upa zah inziritir kawngahte, thawktu tangkai tak an nih thu a tarlang a. MUP hmalakna a chhuanchham leh mi harsate tanpui leh dawmkan hna an thawk thin chu entawntlak a tih thu a sawi bawk a ni. Pawl dinchhan leh thil tumte tihhlawhtlinna kawnga hma an lak thinna chu fakawm a tih thu khuallian chuan a sawi a, Kum upat vanga mahni inchhung ngei a inthlahrun phah te hi thil awm thei a nih rualin chhungkaw puitling din tura rilru, tha leh sum an lo sen tawhna zawng zawng avangin inthlahrung tur a nih loh thu Minister chuan a sawi a. Kan inchhungkhurahte leh khawtlangahte, thalai zawk ten, kum lam a upate duat thiam a, zah thiam a, kan tun dinhmun min thlen puitu an ni tih hre reng chunga zah tak a enkawl kan intihhmuh a pawimawh thu Home Minister chuan a sawi bawk a ni.

Pu K.Thanmawia, General Secretary, MUP tarlan danin MUP hi January ni 4, 1957 khan din a ni a. Tun dinhmun ah General Headquarters 1(Aizawl), District Headquarters 8, Area 90, Branch 589 leh member 70,102 an awm mek a. Mizoram pawn ah Branch 1 leh Area 13 an awm bawk a ni. He hun ah hian MUP hmalakna hrang hrang tarlan a ni a, chung zingah chuan Social Welfare & Tribal Affairs Department hnuai a Multi Service Centre Building, Zemabawka sak mek a nih thu te, MUP Headquarters Building sak zawmna tur a ruahmanna a kal mek thu te leh Upa Pension cheng 1000-a tihsan a nih thu leh pension dawng mi 24,524 an awm mek thu te tarlan a ni.