No.1840/2020-2021

Vawiin khan Home Minister Pu Lalchamliana hovin Lockdown 6.0 kaihhruaina khauh taka kalpui dan tur Chief Secretary Conference Hall, MINECO-ah meeting neih a ni.

Meeting-ah hian Aizawl Bawrhsap-in pawn chhuah tlem chungchang vengtin Local Level Task Force (LLTF) te aurinna a au leh turin thupek chhuah leh se tih rel a ni a, duty-na hmun hrang hrangah police flying squad ruat belh ni se tih pawm a ni a. Civil Hospital thlang damdawi zawrhna huam chhungah damdawi leh mamawh dang lei ten dan angin face mask leh social distancing an zawm tha em tih lo endiktu bik police duty siam belh ni se tih rel a ni a.

Pass pek chungchangah an awmna LLTF/VLTF Chairman in tul a tih angin lehkha ziah sak se, chhhiatna, thihna leh damlohna bikah lo chuan pass pek mai mai nilo se, hmundanga hnathawk leh feh tura chhuak te pawhin an awmna veng LLTF/VLTF Chairman phalna lehkha an nei tur a ni, tih rel a ni a. Feh tura chhuak te hian an awmna veng zing dar 4:30-7:00AM-inkarah an chhuahsan tur a ni a, tlai dar 5:00-7:30PM inkarah an awmna vengah an haw leh hman tur a ni tih hriattir nawn leh ni se tih pawm tlan a ni bawk a.

Mamawh leitura hmundanga chhuak turte chuan an awmna LLTF/VLTF Chairman phalna lehkha an keng tur a ni a, LLTF/VLTF Chairman phalna lehkha kenglo pawn a chhuak te chu The Mizoram (Containment and Prevention of Covid-19) Ordinance Chapter II Offences and Penalties (No. 9) in a phal angin pawisa chawitir zel tur a ni tih rel a ni.

Police duty ten mimal motor tlanchhuak te uluk taka lo ti dinga phalna an neih leh neihloh lo endik zel tur a ni a, Identity Card nei na zawngin pawn chhuah an tum thin avangin, meeting chuan sawrkar office kal te pawh office Identity Card leh detailment order, softcopy emaw hard copy an keng tur a ni a, inmil lo a awm a nih chuan dan (ordinance) tlawhchhanin Police Duty ten pawisa an chawitir tur a ni, tih rel a ni. ‘COVID-19 on Duty’ poster tar mimal motor leh two-wheeler te pawh pawngpaw chhuahnan an hmanloh nan uluk taka endik ni se tih rel a ni.

Dawr kawtah leh sumdawnna hmunah dawr neitu ten Social Distance Marking an siam leh siam loh endik turin police duty ruat belh ni se, siamlo pawisa chawitir tur an ni, tih pawm tlan a ni bawk a ni.

Meeting-ah hian Chief Secretary Pu Lalnunmawia Chuaungo, Home Secretary Pi Lalbiaksangi, IGP (HQ) John Neihlaia, IGP (L&O) L.H. Shanliana leh officials dangte an tel a ni.