2127/2022-2023
Aizawl the 30th September 2022 : Vawiin khan Home Minister Pu Lalchamliana'n e-Forensic System chu Directorate of Forensic Science Laboratory Conference Hall, MINECO-ah a tlangzarh.

Minister Pu Lalchamliana chuan Directorate Forensic Science Laboratory hi thawktu tamlo tak, amaherawhchu India sawrkar pawhin an thawhthat leh thahnemngaihna a hria in recognition a pe a, hmasawn zel a an awmhi an lawmpui awm a ni a ti a. Hotu tha tak leh thawktu thahnemngai tak tak azarah hetiang hi kan thleng thei a ni a ti bawk. Minister chuan thubuai hla buai remna kawngah department tangkai tak an ni a, Kum 2018 khan Inter-operable Criminal Justice System (ICJS) chu Union Home Ministry in a rawn duang chhuak a, he system hnuaiah hian Police, Court, Prison leh Excise te thawhho vekna tur leh Court rorelna chak zawk a kalpui leh, thil ti sual te pawh rang zawk a hrem an nih theih nan online system a in chinfel theih zung zung turin ruahmanna a siam a ni, a ti a. Vawiin a tlangzarh, e-Forensic System hmang tur te chuan rinawmna nena an hman a pawimawh dawn a ni tih hriain, tlangzarh tur leh turh loh te hre hranga, an dinhmun pawimawhna hre reng chunga an hman a ngai a ni a ti a. e-Forensic bikah Directorate of FSL hian Mizoram-ah hma nasa takin, India ram ah e-Forensic System ti hmasa thei kan ni hi a chhuanawm hle a ni a ti a. India ram Justice System ah hian misual a puh hi evidence tha tak nen lo chuan thiamloh chantir an ni lo a, evidence thenkhat Court a theh luh lawk a nih thin loh avangin rei tak chhung thuthlukna siam a ni thin a. e- Forensic System hnuaiah courting chak zawk, leh thuthlukna chak zawk a siam thei ang tih a rinawm a, e-Forensic System chu tangkai taka mipuiten an hmanturin a tlangzarh a ni.

E-Forensics System hi Ministry of Home Affairs hnuaia hmalakna pakhat Inter-operable Criminal Justice System (ICJS) platform pawimawh tak a ni a, pawikhawihtute chunga dan anga rorelna a hun taka hlenchhuah a nih theih nan MHA chuan ICJS hi kum 2018 khan a hawng a. He project hnuaiah hian dikna hlenchhuah kawnga mawhphurtu hrang hrang Police, Forensic, Court, Prosecution leh Prison ten anmahni zawn theuha an hmalaknate khaihlak awm lova awlsam taka an inhriatpawh theih nan CCTNS, e-Court, e-Prison, e-Forensics leh e-Prosecution hmang te in a thlunzawm a ni.
E - Forensics System - ah hian FSL atanga expert report chhuak zawng zawng chu e-Forensics National Portal ah dah niin, case thawntu Police officer chauhin report hi a download theih turin siam a ni. Tun dinhmunah chuan Mizoram Police leh Commissionerate of Excise & Narcotics hnuaia Officer te hman theih turin E-Forensics hi siam a ni phawt a, Department dang FSL dawr thin te pawhin an hman ve thuai theih turin hmalak zel tum a ni.

He programme ah hian Home Minister-in Mizoram FSL Annual Report 2021 - 2022 tlangzarhna hun a hmang nghal bawk. Mizoram FSL hi kum 2015 atang khan Directorate puitlingah hlan kai niin, kum 15 chhung zet chu 'Zero Case Pendency' an kalpui tawh a, India rama FSL hrang hrang zingah case pending nei ngai 10 awmchhun an ni; FSL hian an hnena case thawn thin te tan kum 2014 atang khan an website-ah 'Online Case Tracking System' an siam a, case dawn anih atanga thawnchhuah anih thlengin case dinhmun diktak a thawntu te tan en theihin an siam bawk.

Heng e-report-te hi Mizoram FSL atanga tihchhuah a ni ngei em tih leh khawih danglam a nih leh nihloh finfiah (authenticate) theih turin Digital Signature hmanga sign vek a ni a, report dawngtu tur officer-in email leh SMS kaltlanga One Time Password a dawn hmang chauhin e-Forensics portal ah hian luh theih anih avangin a him hle bawk. Hetiang e-report hi Court pawhin a pawmpui thlap anih avangin hardcopy-a hrana thawn ngai tawh lovin, Paperless system hmang thei tura rahbi thar pawimawh tak a ni. Chutih rualin FSL e-report dawngtu tur lam an inpeih fel hma chu a tul angin hard copy thawn tel zel a la ni rih ang. Sorkar lapui, NCRB in e-report upload tur a tih takah chuan May 1, 2022 atangin digitally signed e-report hi ICJS ah upload niin, Mizoram FSL hi India ramah, expert report - Digital Signature hmanga finfiah theih ngei hmang hmasa ber leh paperless FSL hmasa ber an ni.

Directorate of Forensic Science Laboratory ah hian Director Pu H.Sangchungnunga hovin Forensic expert 15 an awm a. Mizoram chhung khawi hmunah pawh pawihkhawhna a thlenin Police in an koh angin an kal zel thin, Case chi hrang hrang exam bakah Expert Testimony pe in district hrang hrang Court-ah an kal bawk. Kumin 2022 January atanga August thleng hian case 756 leh exhibit 18886 an exam tawh a ni.

Attachment

  • Loading attachment...