Vawiin chawhma khan Horticulture Minister Pu P.C. Lalthanliana chuan Horticulture Directorate Conference Hall ah District Horticulture Officer leh Directorate a thawkte kawm in NEDP hnuaia an Department hmalak dan tur, Kum 2017 kum tir atanga hnathawh chhunzawm tur, hmathar lak dan tur te leh Direct Benefit Transfer felfai taka hman a nih theihna tura ruahmanna te a sawipui.

Meeting kaihruaitu Horticulture Minister Pu P.C.Lalthanliana chuan NEDP atangin Horticulture Department enkawlna hnuaiah kuthnathawktute hmalakna turin a thawhkhatna atan Rs.2 Crore sawrkarin a dah thu a sawi a. Horticulture Department chuan NEDP hnuaiah thlai 2 : Aieng leh Off-Season Cabbage( thlasik zikhlum) te thlan a nih thu sawiin heng thlai 2 chinna hmun tur leh thlaichingtu tur te thlanchhuah hna kalpui mek chu kum in chhunga tifel hmantur in District Horticulture Officer-te beisei an ni a ti a. Minister chuan Horticulture mithiamte chu fuihin Mizoram tan Horticulture chu eizawnna hlawkthlak leh Zoram intodelhna atana pawimawh a ni tih Mizoram mipuite zirtir an kutah a awm a ti. Horticulture hnuaia hlawhtlinna hrang hrang te hmuhtur a awm chho mek zela kawngpui dungtluana thlaithar leh thei tharhlam tak tak chhawpchhuah a ni chu Horticulture in Mizoram tan hmasawnna a thlenmek tih tichiangtu a ni a ti a.Serthlum tharchhuah a rawn pun chhoh chhan pakhatchu ser tar lam tawh te tuaitharlehna(rejuvination scheme) tha taka kalpui a nih vang leh NLUP hnuai serthlum te a rawn thar chhoh tan vang te pawh a ni tel a ni a ti. Sumchang thlai tam zawka thar tur in hmalak mek zel a nih thu sawiin purunsen chin pawh a hlawkchho tih a sawi a. Hun reilote hnuah purunsen chu khamkhawp tharchhuah a beiseiawm thu a tarlang. Sawrkar leh company ten thawhhona tha tak an nei mek tih tarlangin North East Initiative Development Agency nen an thawhhona hnuaiah tractor 2 chu Serchhip District a Serchhip Horticulture Society a zikhlum chingtute hnenah pek a ni dawn a ti.

Meeting ah hian Central sawrkar ruahmanna anga kuthnathawktute hnenah tanpuina sum Direct Benefit Transfer scheme hmanga pek a nih dan te zirchian a ni a. Report a tarlan dan chuan NEDP hnuaia Aieng chinna tur atan hian Rs.80 Lakhs ruahman a ni a, a chinna hmun atan Reiek, Ailawng leh Khawrihnim ramchhung te ruahman a ni a. NEDP hnuai Horticulture hmathar lian zawk, Off Season Cabbage chinna tur hmun atan hian Zikhlum thar hlawkna hmun, tlangsang leh hmut vawt deuh te thlan a ni a. Tui hmuh thatna hmun, zikhlum chin mekna phaizawl leh thlasik thlai dang te hlawhtling taka an chinna hmun te erawh chu tuam a ni dawn lo a ni. Zikhlum chinna tlang pang te hi terrace kumhlun a siamtur niin ramngaw thiat lo zawnga kuthnathawktu te pawh zirtirna pek tum an ni.