Vawiin khan Horticulture Department chuan Hausiampa Hall, Haulawng-ah NLUP hnuaia Mandarin Orange leh Pineapple trade thlangtute hnenah NLUP 2nd Phase Final Installment an sem a, Horticulture Minister Pu P.C. Lalthanliana chuan he hun hi rawn hmanpuiin beneficiaries mi 280 hnenah tanpuina a hlan.

NLUP tanpuina semna inkhawm Lunglei DHO Pu Vanlalnuntluanga Renthlei kaihhruaiah Pu P.C. Lalthanliana chuan sorkarin kuthnathawktuteleh mi harsa zawkte hmangaih takin an hmasawnna tur ruahmanna a siam thin a, NLUP hnuaia tanpuina dawngtute ten he hun hlutzia hrethiam a, tihtakzetna nena thawk turin beneficiaries-te a fuih. Horticulture hnuaia tanpuina dawngte chu an hnathawh dan enfiah zel a ni ang a, thawk tha lote chu ngaihsak zui an hlawh lo a nih pawhin vui thei an ni lovang a, chuvangin a hmaa lo inthlahdahte pawhin tun installment an dawn atangin tan la thar leh turin a fuih bawk. State pawn atangin thlai leh thei la lut ngai tawh lo tur khawpin hnathawk a, intodelh a ngai a ni tiin Minister chuan sorkar chuan kuthnathawktute tan theihtawp a chhuah zel ang a, hlawhtlinna erawh an kutah a awm a ni, a ti. Kumin September atangin Mizoramah Food Security Scheme kalpui tan tum a ni thu sawiin Pu PC Lalthanliana chuan hemi atan hian khawtinah a dawng tur awm mi chhumchhia deuhte thlan an ni dawn a, hengte hnenah buhfai kg.1 cheng 3-in hralh a ni ang, a ti. Mualthuam ‘N’ ah Horticulture Deaprtment hnuaiah ‘Centre of Excellence din tum a ni a, hemi atan hian cheng vaibelchhe 5 dah tawh a nih thu leh puantaha eizawng tur chhungkaw 100 thlan a nih tawh a, sorkarin tanpuina a pek tur thu a sawi bawk.

 NLUP District Coordinator, Lunglei Pu Zathangliana pawhin thu sawiin Lunglei District chhungah NLUP hnuaiah a thawhkhatnaah cheng nuai 6870 chuang sem tawh a ni a, tuna tanpuina an sem mekah cheng nuai 340 chuang sem leh a nih tawh thu a tarlang a. Tanpuina sum sem tawh zawng zawng ngaihtuahin Lunglei District hmel tidanglam khawp a ni a, a dawngtuten inenletin an tanpuina dawn chu an hmang dikin an hmang tha em tih inzawtlet theuh turin a chah a. NLUP hi hausak thut nan ni lovin chhungkua chawm nan a ni tih hre rengin tihtakzeta thawk turin benefiaries te a hrilh. Beneficiaries zingah kangmei emaw chhiatrupna thil emaw vanga vanduaina tawk an awm a nih chuan repor felfai taka ziakin thlalak nen NLUP hotute hnenah thawn a ni ang a, chhawmdawl ngaite chu sorkarin a tanpui theih dan tur kawng zawn mek a ni tih a tarlang bawk. Chhumchhiate tanpuina tur CM’s Special Scheme hnuaiah Lunglei District chhungah mi 125 thlan an ni a, cheng 20,000/- theuh pek an ni ang, a ti.

Vawiina Horticulture hnuaia tanpuina dawngtute hi khaw 13 - Haulawng, Mualthuam ‘N’, Sekhum, Ramlaitui, Kanghmun, Mausen, Hmuntlang, Zotuitlang, Chengpui, Phaileng ‘S’, Bualpui ‘V’, Chhipphir leh Zote ‘S’ atangin an lo kal a. Heng beneficiaries-te hi Horticulture Extension Officer Pu JH Zosiamliana chuan serthlum leh lakhuihthei enkawl dan training a neihpui nghal bawk a ni.