Tunlai ruahsur nasat avanga Serchhip Tuikhuah Venga leikhi leh lei tlahniam chu vawiin chawhnu dar 3:00 khan District Bawrhsap mawhphurhna chelh mektu Pu VL Remliana, Addl. DC hovin thuneitu pawimawh ten a hmunah an en a, Serchhip-III Village Council member te leh Serchhip District MJA memberten lo dawngsawngin hmalak dan tur an sawiho.

Tuikhuah Veng tan tlang tu National Highway 54 chu tunah hian meter 40 vel a thui a tlahniam a, hei bakah hian zau takin lei hi a chet bakah hmun hrang hrangah leikhi engmawzat a awm bawk a, a hmun endiktu mithiamte chuan lei che zel tur dan chu thil hautak ani dawna an hriat thu leh sum sen a tam tham dawna a lan vangin hun engemaw chen nghah a ngai dawn a an hriat thu an sawi a, tun maia hmalak theih awm chhun ni a an hriat chu kawngpui chung lam atanga tuihawk rawn lut thla tam lutuk ven leh lei chet nasat zualna bul vela tuihawk luan kawr uluk taka siam hmasak phawt a ni an ti a, helai hmun chet dan uluk taka report siam a thuneitu sang lama thlen thuai tha a a hriat thu Pu VL Remliana chuan a sawi.

Serchip Village Council-III Vice-President Pu C.Lalhminghlua chuan Tuikhuah Veng lei khikna hmun hi kum 10 dan velah a che ziah thin ni a an hriat thu a sawi a; kum 1988 khan helai hmun hi a chet nasat vangin a chhehvela chengte pawhin an chhuahsan vek a, National Highway No. 54 pawh a khawih chet avangin kawng thar sial a ngaih phah hial a, kum 2007 khan a chet nasat leh deuh avangin a hnuaia lamah BRTF ten check-dam lian vaklo an lo siam tawh a, hei hian engemaw chen chu lei che tur a veng ni a an hriat hnu in tunhnai fur ruahtui tlak tam vangin kawng chhuat hi a khi leh a ni a ti bawk.