2683/2025-2026

Dated Aizawl: the 16 December 2025 : Vawiin khan Horticulture Minister Pu C. Lalsawivunga chuan Aijal Club-ah, International Year of Cooperation 2025 kharna puala Cooperation Department leh a kaihhnawih State-level Federation hrang hrangte hmalakna thlirhona hun chu khuallian niin a hmanpui a. Regional Cooperative Excellence Award a hlan nghal bawk a ni.

He hunah hian khuallian Horticulture Minister Pu C. Lalsawivunga chuan kalkhawmte hmaah thusawiin, United Nations International Year of Cooperatives denchhena department hmalakna hrang hrangte chu chhuanawm a tih thu a sawi a. Cooperation chu department lian ni lo mah se hmasawnna huapzo (inclusive development) thlen theitu pawimawh tak a ni a ti a. Hmasawnna hmel thar, department-in a hmu chho zel chu lawmawm a tih thu tarlangin, department officer leh state-level federation hruaitute chu theihtawpa sawrkar thawhpui chhunzawm zel turin a sawm a. Sawrkar duhsakna hmang tangkai ngei tura tan la sauh sauh tura fuihin, kalkhawmte chu thahnemngai taka thawk chhunzawm zel turin a sawm nghal bawk a ni.

Vawiina hun hmanah hian Kolasib DCO chu Best DCO lawmman hlan an ni a. Khualzahawm, Pu Udid Prakash Rai, Commissioner&Secretary, Cooperation Department chuan lawmman hi a hlan nghal a ni.

Vawiina hun hman hi Pu John L.T. Sanga, Registrar, Cooperation Department-in  kaihruaiin kalkhawmte lawmna thu a sawi a. Pu Udid Prakash Rai, Commissioner&Secretary, Cooperation Department chuan hun hmandan tur tlangpuite  leh thupui sawi hmawrhmuhna hun a hmang a. Pu Lalrinmawia, Asst. Registrar, Cooperation department, MAHFED Ltd leh MCAB Ltd atangtein presentation  ngaihthlak a ni a. Pu C. Lalrammawia, Chairman, MULCO chuan lawmthu sawiin  hun hi a khar a ni.