2682/2025-2026

Dated Aizawl: the 16th December 2025: Tukin zing dar 7 khan Social Welfare Minister Pi Lalrinpuii’n ‘Pangthianga Building’, OKM Home (Rehabilitation Centre & Homeless Shelter), Phunchawng chu a hawng a, he hunah hian Social Welfare Joint Secretary, Pi Zonunthari leh Joint Director, Pi Caroline Hmingthanzuali te’n an telpui.

He hunah hian Chief Guest Pi Lalrinpuii chuan thu sawiin mipuite chu Krismas chibai a buk a, home-a awmte fuih bawkin, Mizoram leh phai lama ngawlvei an enkawl dan a dang a, Pathian rinchhana ruihhlo enkawl damte dam dan chu a chian bik thu a sawi a. Ngawlveina atanga chhuak tawh Pathian rawngbawlna lama kal ta te pawh sawi tur an awm nual thu a sawi.

Tum neia awm a that thu sawiin Minister chuan Home-a awmte pawh skill training neih an duh phawt chuan LESDE hnuaiah a zir theih thu a sawi a, Social Welfare Department kaltlangin Hand Holding Scheme hnuaiah pawh kawng a awm thu a sawi. Pangthianga Building satu, Lalengmawii Pachuau te chhungkua chu midangte tanpui thei tura an thawhrim tur zia te a sawi a, taimakna bakah pawisa hman thiam a tul zia te a sawi bawk a ni.

Social Welfare Minister chuan OKM founder Pi Vanlalruati inpekna chu a ngaihsan thu a sawi a, a hna a chhunzawmna zel turah sorkar in theihtawp chhuahpui an inhuam thu a sawi. District tinah sawrkar enkawl a ni emaw, ni kher lo emaw, ruihhlo ngaite enkawlna tur hmun siam an tum thu a sawi bawk.

Mizorama ruihhlo do kawngah Social Justice and Empowerment Union Minister leh ‘Doctors without Borders’ te pawh thawhpui an tum thu a sawi bawk.

Kan hmaa lo thleng tur Krismas ah pawh thinlung taka Isua Krista kan fak theihna turin sual lamah niloin tha lama rilru pe turin a sawm a. Duhna tak tak nena Isua rawngbawl tura an inpek chuan a la tlai lo a, Pathianin kawng hrang hrangah nasa takin mal a sawm ang tih a sawi bawk.

He hun hi Rev. K. Lalpiangthara, Chairman, OKM Advisory Board chuan a kaihruai a, lawmthu sawina hun a hmang bawk. Upa R. Lalnunthara, Secretary, OKM Advisory Board chuan thupuanna hun a hmang a, building hlanna hun hi Rev. Lalzuithanga’n a hmang bawk. Building donate tu, Lalengmawii Pachuau te chhungkaw lam atangin thu an sawi bawk.