2478/2026-2027

Dated: Aizawl the 1st of October,2026: Vawiin khan Reiek Tourist Resort-ah Pu C.Lalsawivunga, Horticulture Minister chuan Anthurium Festival chu Khual Lian niin a hawng. Anthurium festival hi Tourism department leh Horticulture department tangkawp buatsaih niin 1st October,2026 atanga 3rd October,2026 chhunga neih tur a ni. 

Horticulture Minister chuan Anthurium festival hmang tura lo kal te hnenah lawmthu sawiin ni thum awh tur festival hlim leh nuam taka hmang turin a sawm a. Anthurium festival hi kum 2006 atanga neih tan tawh niin kum 2 chawlh lailawk hnua Tourism leh Horticulture Department tangkawpin an buatsaih leh thei chu a lawmawma,tourism industry a eizawngte tan pawh hlawkna tam tak a thlen a beisei thu a sawi. 

Minister chuan Reiek leh Ailawng chu Mizoram tourist destination pawimawh tak a nih thu sawiin tourism industry a eizawng pawh mi tam tak an awma,tlang mawina te, khaw danglam bikna te chu eizawnnaa chantir zel tur leh ramngaw thing leh mau nungchate veng hima mi dangte tana tlawh chakawm leh zual tura heng hmun hmate enkawl turin a chah.Minister chuan Mizoram chu kan sik leh sa nen anthurium chin a inmil em avangin anthurium thar chhuah te chu a quality a tha bik a, Zo Anthurium Growers Cooperative Society (ZAGCS) kaltlangin state pawnah Mizorama anthurium thar chhuah thawn thin a nih thu a sawi.

Pu C.Lalsawivunga chuan festival hmangtute hnenah zo nun ze mawi - tlawmngaihna, mikhual te chunga that chhuah leh faina leh thianghlimna ngai pawimawha par chhuah pui turin sawm a ni. 

Vawiin hunah hian Dr Lalrozama, Commissioner & Secretary, Tourism Department chuan inlawmna thu a sawia, Mamit DC, Horticulture Department Director, khawtlang hruaitute leh officials dangte an tel a. Central YMA leh Reiek cultural team te chuan Mizo lam hrang hrang an pholang a ni. 

Anthurium Festival 2026 hi ni thum  1st October - 3rd October,2026 awh tur niin trekking, cave expedition, Zo Khua live experience, hidden bloom garden visit, nghakual chiah, cable foot bridge leh a dangte Reiek leh Ailawng a neih tum a ni.