2474/2026-2027 

Saitual, the 1st October, 2026: Vawiin khan Department of Sericulture leh MKVIB tangkawp buatsaihin Banakaih Handholding scheme hnuaia Saitual Progress Partner te tana training buatsaih chu Mualphung leh Keifang ah hlawhtling taka neih a ni. 

He hunah hian Sericulture Director Pu Lalrinawma chuan thu sawiin, Hand Holding hnuaia thahnemngai taka hmalak a tulzia leh Progress Partner te mawhphurhna sanzia a sawi a, Sawrkarin kut hnathawktute a ngaih pawimawh thu a sawi bawk. He training a hlawhtlin theihna tura bialtu Minister Prof. Lalnilawma’n Progress Partner te hman tur Tanky a ngaihtuah sak avangin lawmthu a sawi bawk a ni. Pu Lalrinawma chuan Hand Holding hnuaia Progress Partner te chu hlawhchham a thiang lo a ni tih sawiin, theih tawp chuah a hma la turin a fuih nghal a ni. 

Pu C. Lalremliana, MKVIB Chairman pawhin thu sawiin, he project hi Muga Project a nih ang taka ngai pawimawh turin a chah a. Thlai dang pawh ching mah se, Muga hi ngai pawimawh hmasa ber turin Progress Partner te a chah bawk a ni. India ram pumah pawh North East India chauh a chin theih, thil hlu tak kan neih hi kalkhawmte chu ngaihlu turin a ngen a, Muga pangngang hmanga eizawnna chu eizawnna tangkai tak niin, ramngaw ti chereu lova, ramngaw siam pah a eizawn theihna hlu tak a ni tih a sawi bawk a ni. 

Pu. B. Lalchhuana Joint Director, Sericulture chuan Mizoram sorkarin Sericulture Department chu India ramah Silk la thar chhuak tam ber state ni turin hma lak mek a nih thu a sawi a. Sericulture department than chhoh zel na tur chuan Progress Partner te an pawimawh hle tih sawiin,  hlawhtling ngei tur in Progress Partner te a fuih a ni. 

Vawiin training program hi Pu B Zonuntluanga, Project Coordinator chuan kaihruaiin, kalkhawmte hnenah Hand Holding Scheme kalphung leh hlawhtlinna tura hmalak dan tur pawimawh tak te a zirtir a ni a, Pu B. Zonuntluanga, Project Coordinator chuan kalkhawmte hnenah Muga chaw chin dan leh a enkawl zui dan tur te, Muga pangang khawi chunga thlai dang chin theih te chungchang zirtina pein, Progress Partner te pawimawhna a tarlang bawk a ni.