2477/2026-2027 

Aizawl dated 1st October 2026: Vawiin chawhnu khan SCERT, Mizoram buatsaihin ‘45th State Level Students’ Science Seminar’ hmawrbawkna leh ‘SAfES Portal’ tlangzarhna hun chu School Education Minister, Dr. Vanlalthlana hovin SCERT Auditorium, Aizawlah neih a ni a. Kumin Seminar thupui chu ‘Indian Energy Basket 2047: Prospects and Challenges’ tih a ni.

Khuallian Dr. Vanlalthlana, School Education Minister chuan zirlai kalkhawmte chu Science hmanga thil nihna dik tak hriat chakna thinlung, ‘Scientific Temper’ nei turin a fuih a. Zirlai hlawhtlin ni tur chuan rin thu mai maia thil sawi lovin, thil nihna dik tak hai lang tura inchhiar peih a pawimawh thu a sawi a. SCERT bultuma 45th State Level Students’ Science Seminar buatsaihna chuan Science zirna kawngah zirlaite hriat belh chakna a tih pun belchhah ngei a beisei thu a sawi bawk a ni.

Education Minister chuan Standardized Assessment for Elementary Schools (SAfES)  Portal a hawn rual hian, he portal kaltlang hian Mizoram puma zirlai ten an zirnaah hmasawnna rualkhai an neih theihna tura hmanraw tangkai tak a nih tur thu a sawi a. School hrang hranga zirlaite zirna dinhmun endikna portal him leh langtlang tak buatsaih a ni chu SCERT-a thawktute fakawm a tih thu a sawi a. He hmalakna hian India ram puma Perforamance Grading Index (PGI)-a Mizoram dinhmun tih hmasawnna a thlen ngei a beisei thu a sawi. 

Science Seminar leh SAfES Portal tlangzarhna hun hi Pi Caroline Zoramthangi, SCERT Director chuan a kaihruai a. Pu F. Lalliansanga, Deputy Director, SCERT-in Science Seminar chungchang report pein, Pu PC Lalrintluanga, Science Consultant hnen aṭangin SAfES Portal chungchang report ngaihthlak a ni a. Science Seminar-a Judge-te zing aṭangin Seminar hmanga intihsiakna an en dik dan leh zirlaite fuihna ngaihthlak niin Pi Zoramthangi Ralte, Joint Director-in lawmthu sawina hun a hmang a ni.

State Level Students’ Science Seminar-ah hian Judge atan (i) Dr. PC Lalngilneia, Senior Scientific Officer, MISTIC, Department of Science & Technology, (ii) Dr. K. Vanlaldinpuia, Asst. Professor, Department of Chemistry, Pachhunga University College leh (iii) Pu PC Lalrintluanga, Science Consultant, SCERT-te an ṭhu a ni.

Science Promotion Wing, SCERT hian Science zirna tihhmasawn nan leh chawi nun nan Science Exhibition, Science Drama Competition, Incentive Cash Awards, Training, Laboratory/equipment sem leh a dangte hmangin hma a la ṭhin a. State Level Students’ Science Seminar pawh hi kum 1979 aṭang khan kum tin District level-ah leh State level-ahte a buatsaih ṭhin a ni.

Mizorama District pakua (9)-a neih, District Level Science Seminar-a pakhatna ṭheuhte chu an district aiawhin he Seminar-ah hian an tel a. State Level-a pakhatna hi Mizoram aiawhin ni 30 October, 2026-ah National Science Seminar, National Science Centre, Pragati Maidan, New Delhi-a neih turah a tel dawn a ni.

Vawiina State Level Students’ Science Seminar-a tiṭha pathumte chu:

1.    Pakhatna:     TBC Vanlalzawmi, Marian HS, Serchhip

2.    Pahnihna:    Thelma Z. Nghoneiza, Maraland Academy, Siaha

3.    Pathumna:     Rinchungnungi, Govt. GM HS, Champhai

He programme-ah hian Dr. Vanlalthlana, School Education Minister chuan ‘SAfES Portal’ a tlangzarh bawk a. Standardized Assessment for Elementary Schools (SAfES) hi Mizoram-a elementary education tihhmasawnna tura School Education Minister Dr. Vanlalthlana hmalakna pawimawh tak niin State Council of Educational Research and Training (SCERT), Mizoramin a kalpui mek a ni. He assessment hian Government School, Deficit School leh Grant-in-Aid (GIA) school-te a huam a, NEP 2020 leh NCF-SE-in a tarlan kalphungte nena inrem tura buatsaih a ni.

Kum 2025-26 khan SAfES hi Pawl V leh Pawl VIII tan kalpui a lo ni tawh a. Harsatna awmte sut kian nan Directorate of SCERT chuan Web Portal a siam thar a ni. He portal hmang hian school leh zirlaite assessment data lak khawm, finfiah leh en dik chu awlsam zawkin kalpui theih a ni dawn a. Tin, SAfES thuchhuah leh hriattirna pawimawhte pawh portal hmangin school-te hnenah sem darh theih tura duan a ni.

SAfES 2027 hi elementary education-a stage pawimawh pathum – Pawl IV, V leh VIII-ahte kalpui a ni ang a, Third Term Examination-ah common questions hmangin SAfES hi neih tur a ni.