2475/2026-2027

Dated Aizawl, the 01 October 2026: Vawiin khan Social Welfare, Women & Child Development Department changtu Minister Pi Lalrinpuii chuan Chandmari YMA Hall-ah, Directorate of Social Welfare, Mission Foundation Movement leh MUP General Headquarters-te tangho buatsaih Khawvel pum a Upate ni 2026 puala hun hman chu khuallian niin a hmanpui.

He hunah hian khuallian Social welfare, Women & Child development Department changtu Minister Pi Lalrinpuii chuan thusawiin, ram rohlu Upate puala Khawvel puma hman thin kumina hman leh theih a ni chu lawmawm a tih thu a sawi a. Upate chu ram leh hnam rohlu an nih avanga chawimawi phu an nihziate sawiin, thalai kalkhawmte hnenah upate ngaihhlut zual zel a pawimawh thu te a sawi a. Minister chuan kum upa kalkhawmte chu hrisel taka an dam theih nan ei leh in bakah an nitin nunphungte uluk tura chahin, insawizawi uar tur tein a chah bawk a. Zuk leh hmuam leh ei leh in hrisel lo lakahte inthiarfihlim tura chahin, an tu leh fate tan rei tak dampui thei tura invawng tlat turin a chah a. Anmahni puala ni bik Khawvel pumin a serh chu hlim taka hmang turin duhsakna a hlan nghal a ni.

Khawvel puma Upate ni hi kum 1991 atang khan, kum tin, thupui hrang hrang neiin hman thin a ni a. Kumin Khawvel pum Upate ni thupui chu ‘Dam reina hun: dam rei tura ruahmanna thar (The age of longevity, rethinking systems for longer life]’ tih a ni a. Hemi pual hian vawiin atana mithiam sawm bikte hnen atangin Upate tana Sawrkar laipui leh State sawrkarin hamthatna a duante bakah Insawizawidan tur leh damdawi hmanga inenkawldan chungchangahte thu bengvarthlak tak tak ngaihthlak nghal a ni a. Nilengin kum upa kalkhawmte tan Directorate of Ayoush chuan Free Health Clinic an buatsaihsak bawk a ni.

Kumin Upate ni pual hian Kum za tling mi 11-te hnenah chawimawina leh lawmpuina thilpek hlan niin, he ni pual veka intihsiakna hrang hrang Reels insiam siak, Essay inziah siak leh AMC huam chhunga MUP branch hrang hrangte tana Lengkhawmzai intihsiakna neih tak lawmman te pawh sem nghal a ni.

Vawiina hun hman hi Pi Lalzarmawii, Commissioner & Secretary SW, W&CD chuan kaihruaiin kalkhawmte lawmna thu a sawi a. Pu Nhaklianmawia, MUP General Headquarters President chuan thu sawiin, Pi Zonunthari, Joint Secretary, SW, W&CD-in Upate tana Sawrkarin hamthatna a duan te a sawi zau a. Hemi zawh hian Resource Person ten kalkhawmte chu zirtirin, Pu Lalremsiama, Tutor, MFM Nursing School chuan kalkhawmte hi Upate tana Insawizawidan te a takin a zirtir a. Dr. L.H. Zonunsiami, Lecturer, Laithangpuii College of Pharmacy chuan Upate damdawi hmanga inenkawldan chungchang a zirtir a. Pu Lalnunhlua, Additional Secretary, SW, W&CD chuan lawmthu sawiin hun hi a khar a ni.