Vawiin chhun lai khan Horticulture Minister Pu P.C. Lalthanliana chuan Thingdawl-a Horticulture Centre atangin balhla chi tha chi, tunlai thiamna hmanga laboratory atanga siam chhuah te chu Kawnpui leh Kolasib-a thlaichingtute hnena sem turin a phurtu motor-te a vailiam a. Parliamentary Secretary Pu K. Lalrinthanga nen balhla chi hi Kolasib, Kawnpui leh Thingdawla thlaichingtute hnenah an sem chhuak nghal bawk.
Pu P.C. Lalthanliana chuan, “Mizoram sawrkar chuan miretheite khaichhuahna turin NLUP a kalpui mek zel a, sawrkarin theih tawp a chhuah laiin kuthnathawktute zingah a titha peih lo an awm thin avangin duhthusamin kan hlawhtling lo fo va. Horticulture Department chuan thlai chingtute chu hlawhtlinna tlang thlenpui che u kan tum tlat a, hautak taka balhla chi tha chi kan buaipuite hi a dawng hmasatuten entawntlaka in enkawl puitlin hi kan beisei tak meuh a ni” tiin balhla chi dawngtu turte chu a fuih a ni.
Horticulture Minister chuan, “Pathianin thlai tinrengin a ngeih tur ram leilung tha tak leh, sik leh sa tha min pe a; kan intodelh loh chhan hi kan chhut chian a tul a. Sawrkar leh kuthnathawktute kan tanrual hle a tul a ni” a ti a. Thingdawl hmuna Horticulture Centre chu thlai chi tha bik siamchhuahna tur atana duan (centre of excellence) a nih anga tihchangtlun chhoh mek zel a nih thu a sawi rualin, Mizoram chhim lam, Haulawng leh Mualthuam ramah cheng vaibelchhe 10 senga ‘Centre of Excellence’ bun tura hna thawh mek a nih thu leh, hemi senso atana Central sawrkarin cheng vaibelchhe 5 a rawn pek tawh thu pawh Pu P.C. Lalthanliana chuan a sawi lang a ni. “Horticulture Department chuan Mizoram-a thlai chin theih leh a hralhna pawh awm nghal, phai atanga kan lakluh thinte chu Technology Mission hnuaiah hmun 350 velah ngawrh taka chin chhin kan tum mek a ni” Minister chuan a ti bawk.
Vawiina balhla chi sem tak te hi Mizo balhla kual sei (tall cavendish) a ni a; kum 2013 khan Horticulture Department leh Elegant Flower Company, Kolkata chuan inremna an siam a. Chumi dungzui chuan, Horticulture Department chuan natna laka fihlim ngeia hriat balhla te lakhawmin, Chite-a an farm-ah treatment an pe a. Chumi hnu chuan a bul-bal chu Kolkata-ah thawnin, Elegant Flower Company hian laboratory-ah balhla timur atangin tissue culture hmangin balhla chi hi an siam chhuak a; a tiak te chu thlawhnain Lengpui airport-ah an rawn thawn thleng thin a. Hetianga siam, balhla chi nuai 3 chu Thingdawl-a Horticulture Centre-ah hian loneitute hnena sem chhuah tura enkawl leh zet a ni a; tunah hian Mizoram pumah a chi-te hi sem chhuah thuai tum a ni.
Tissue culture hmanga balhla chi siam chhuahte hi enkawl uluk chuan thla 10 chhunga rah hman tura beisei a ni a; balhla chi pakhat enkawlna atan hian a chi siam atanga sem chhuah a nih thlengin Rs 23 vel zel Horticulture Department chuan a seng a ni. Hun lokal lehzel turah chuan he balhla chi tha chingtute hnen atang hian a chi peng lei khawm leh turin ruahmanna an siam nghal bawk.
Horticulture Minister Pu P.C. Lalthanliana hi Parliamentary Secretary Pu K. Lalrinthanga bakah, Horticulture Director Pu R. Zotawna leh officer dangten an tawiawm a ni.
