Chief Minister hova Lunglei Dist High Powered Comittee Meeting September ni 4 a neihin a lo rel tawh Lunglei khawpui a hmasawnna hna thawh dan tur ruahmanna hrang hrangte chu tukin zing khan HPC Vice Chairman Pu Joseph Lalhimpuia leh sawrkar mipawimawh ten an en ho.

September ni 4 a HPC Committee Chief Minister hova neih tum hian cheng nuai sang 3, za 2 senna tur Lunglei Supper Market bula Shhoping Centre sak tumna chu a hmunhma tihfel thuai nise chak taka hna kalpui dan ngaihtuah nise an lo ti tawh a, hei bakah hian SDEO Lunglei North leh South Office te chu DEO Office bulah dah nise helai hmunah hian Education Complex siamin, Teachers Inn leh Adult Education te pawh dah nise tiin an rel bawk a, hei mai bakah Shopping Centre sakna tur hian Lunglei Minor Irrigation Office sakna hmun tur a tih buai dawn bawk avangin SDEO pahnih Office hmun ruak turah Minor Irrigation S.E leh E.E Office te sak nise tih a ni bawk a ni.

Hetianga HPC meeting in a lo rel tawh te hmalak chhunzawm dan tur bawhzui hian heng hmun hrang hrang te hi tukin zingkar khan tlawh kualin HPC Vice Chairman bakah hian Minor Irrigation leh Transport changtu Secretary pu H. Darzika; Lunglei D.C Pu V. Sapchhunga; Transport Director Pu Lalthlamuana; Minnor Irrigation Chief Engineer Pu Thanliana leh a kaihhnawih Deptt Officer engemawzat te an tel a, HPC Meeting in ruahmanna a lo siam te chu tha an ti tlangin, an thil hmuh dan leh thil kalpui chhunzawm dan tur te Chief Minister hovin thlirnawn leh nise hemi hnu hian bawhzui ngai ang ang te chak taka kalpui nghal nise an ti a ni.

Tukin a hmun hrang hrang an tlawhkual hnu hian Circuit House ah meeting neih chhunzawm nghal a ni a, hetah hian HPC Vice Chairman Pu Joseph Lalhimpuia chuan thu sawiin, Chief Minister thahnemngaihna leh sawrkar Deptt. hrang hrang te nen thawhhona tha tak an neih avanga Lunglei lamin hmasawnna a neihbelh zel chu lawmawm a tih thu sawiin, tuna ruahmanna lian tak tak te pawh tihhlawhtlin thuai a nih theih nan thawhhona tha tak hnuaiah theihtawp kan chhuah tlan theuh a pawimawh a ni a ti a, nakum atangin Lunglei ah Computer hmanga thiamna chi hrang hrang zirna NIELITS dah a nih tur thu leh a hmun atan Mizoram polytechnic hmun chu beisei mek a nih thu a sawiin, Shopping Centre sakna tur cheng nuai sang 3, za 2, pawh DPR Ministry of Urban Developement ah thehluh tawh a nih thu leh reilote ah pawisa hmuh beisei a nih thu a sawi bawk a ni.