Vawiin khan Lunglei BDO Conference Hall-ah nikum December thlaa neih zawh tak Mizoram State Games 2019-a Lunglei East Assembly Constituency atana Medal la te Lunglei East AC MLA leh Lunglei HPC Vice Chairman ni bawk Pu Lawmawma Tochhawng hovin chawimawina hun hman a ni. Mizoram State Games 2019 ah khan Lunglei East AC hian sports discipline hrang hrangah medal 23 (Gold – 7, Silver – 7, Bronze - 9) la in Mizoram pumah 11-na an ni a; Lunglei District-ah pakhatna an ni.

Pu Lawmawma Tochhawng chuan Mizoram State Games 2019 ah Lunglei East AC in dinhmun tha tak a luah thei chu lawmawm a tih thu sawiin Organizing Committee member-te, infiammite leh party hruaitute thawhrimna leh inpekna rah a ni tiin an chungah lawmthu a sawi a. Infiammite chu State Level piah lamah National leh International Level thlenga hlawhtlinna nei thei tur khawpa theihtawp chhuah tura fuihin an thalai puite a tha zawnga kaihruai tura tan la zel tur leh eng kawng zawh tur pawhin Zirna a pawimawh thu a sawi a. Sawrkarin infiammite tana hamthatna a ruahman te pawh ngaihven leh zir chiang turin a chah bawk.

Vawiina chawimawite hi Sport Discipline hrang hrang a medal la te an ni a, chawimawina thuziak leh pawisa fai hlan an ni. Lunglei East AC hian Mizoram State Games-a Sports Discipline awmte 32 zingah 19 ah telin medal 23 (Gold – 7, Silver – 7, Bronze - 9) la in Mizoram pumah 11-na an ni a; Lunglei District-ah pakhatna an ni.

Gold Medal –           Citation + Rs. 4000/-

Silver Medal –         Citation + Rs. 3000/-

Bronze Medal –      Citation + Rs. 2000/-