Lunglei Dist chhunga kuthnathawktu hlawhtling ber te zing ami Pu Lalhriatpuia huan Lunglei Ramthar veng a mi chu vawiin khan Lunglei Dist High Powered Comtt Vice Chairman leh sawrkar Official thenkhat ten an tlawh.

Helai hmun tlawhtu HPC Vice Chairman Pu Joseph Lalhimpuia chuan sawrkar tanpuina diklo taka hmang thin tam tak an awm laia tanpuina an hmuh ang angte bakah mahni kutkawih ngei nena rim taka thawktu Pu Hriatpuia te chu fak tlak nia a hriat thu sawiin, sawrkarin huan Lo ram enkawlna tur a pek leh kawng hrang hranga a tanpuina te ti hlawhtling tura theihtawp an chhuahna a taka hmuh tur awm chu sawrkar tan pawh a lawmawm a ni tiin, midangte tan entawn tlak a ni a ti bawk. Pu Joseph-a chuan tih tak takna nena thawka hlawhtlin tum tlat te chu sawrkarin a tanpui hreh lo a ni tiin, kan hnathawhna theuhah pawh dikna leh rinawmna nen taima taka kan thawh phawt chuan kan hlawhtling ngei ngei ang a ti bawk. Pu Hriatpuia huan hi kum 10 chuang zet a upa ni tawhin thlai chi hrang hrang an ching a, heng atang hian kumtin cheng nuai 4 chuang an hralh chuak thin a ni. An huan enkawlna tur hian Horticulture department te leh Agriculture department te chuan a theih ang angin hma an lakpui bakah HPC atang pawhin hmalak pui an ni tawh bawk. Vawiin a HPC Vice Chairman in helai hmun a tlawhna ah hian ADHO Lunglei bakah sawrkar Official thenkhat ten an tawiawm a ni.