No.489/2020-2021

Tlabung Sub Division huamchhunga Covid-19 laka invenna a hmuna enfiah tura Tlabunga cham mek Lunglei HPC Vice Chairman Pu Lawmawma Tochhawng chuan vawiin khan Tlabung khuaa sawrkar pisa te tlawhin hnathawktute nen hmalakna kal mek leh hmachhawpte an sawiho.HPC Vice Chairman hian Tlabung SDO (C) office, Tlabung Sub Divisional Hospital, SDPO Office leh FCS&CA godown-te a tlawh a ni.

HPC Vice Chairman chuan Sub Divisional Task Force, VLTF-te leh Damdawiin te inpuahchahna felfai tak chu fakin, Covid-19 hrileng mekin engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni, a ti. Bangladesh international border thui tak a awm avangin Covid-19 hrileng lakah an fimkhur lehzual a tul takzet a ni tiin official-te chu an theihtawp chhuah chhunzawm zel tur leh harsatna an neihte a hnena thlen vat thin turin a chah a ni.

Tun dinhmunah Tlabung Sub Divisional Hospital-ah COVID-19 vei rinhlelh te dah hranna tur khum pathum (3) awmna Isolation Ward a buatsaih a. Tin, India ram pawn leh phai atanga lo haw dah hranna/ inkhunghranna (Quarantine) na atan Quarantine Facility pahnih Tlabung Tourist Lodge hlui leh a thar ruahman a ni bawk. Mahni ina inkhunghrang (Home Quarantine) pakhat leh Quarantine Facility a awm mi pakhat an awm mek a ni.

Tlabung SDPO Pu Lalrinpuia Chenkual chuan venhimna leh dan leh thupek kenkawh kawngah VLTF-te nen kawng engkima hma an lak tlan thu tarlangin Tlabung Sub Division ah hian ramri hrula khua engemawzat a awm avang leh inkalpawhna a that tawkloh avangin police te pawh an indaihlo hle a, staff dah belh an mamawh thu HPC Vice Chairman hnenah hian a thlen a ni.

Ei leh bar dinhmun enfiah turin FCS&CA Godown pawh tlawhin Pu R. Lalzirliana, Inspector FCS&CA Tlabung leh staff ten anlo dawngsawng a. Tun dinhmunah buhfai leh essential commodities stock dinhmun a that thu leh hlauthawnawm a awmloh thu sawiin godown-ah Buhfai 5234.83 quintal stock a awm mek a, thla khat a sem chhuah zat thin chu 1850 quintals a ni.