Nakuma Mizoram Baptist Kohhran Hmeichhe Pawl Inkhawmpuina hmun tur Zobawk mual laihzau hna chu nimin atang khan tan a ni. Mual laihzau tanna inkhawm tawi hi MBKHP inkhawmpui Comittee Chairman Upa R. Lalrinawma\'n kaihruaiin, bialtu Pastor Rev. Zochalhlira\'n hunserh a hmang.

He hun hmanpuitu HPC Vice Chairman Joseph Lalhimpuia chuan thu sawiin, Zobawk Mual chu duh anga a la zauh tawk loh vang leh nakum maiah MBKHP inkhawmpui an dawlna hmun tur a nih bawk avangin khawtlang hruaitute leh kohhran hruaitu ten Mual laihzau an mamawh thu sawrkar-ah an thlen thin a, an duhna te sawrkar-in hriat sakin Rural Development Department kaltlangin cheng nuai 12 Mual laihzau nan hian ruahman sak an ni, a ti. Mual laih hna hi mimal emaw pawl emaw tumahin thawktu nih tum lova inkhawmpui Comittee kut a dah a ni hi Zobawk khawtlang hruaitute leh mipuite an fakawm hle a ni, Pu Lalhimpuia chuan ti bawkin, khawtlang leh ram rawng kan bawlnaah hian mahni leh chhung leh khatte in vur ringawt ngaihtuah lovin  khawtlang leh ram tana tha tur kan ngaihtuah hmasak ber thin hi a pawimawh a ni, a ti bawk.

Hei bakah hian Zobawk Community Hall sak mek chhunzawm nan cheng nuai 4 leh sing 5 Rural Development atanga pek an nih bakah hei bak la mamawh tur pawh tunah hian department lamin ngaihtuah an tum mek a ni, Pu Lalhimpuia chuan a ti bawk. Nimina  Zobawk Mual laihzau hna tan nan hian HPC Vice Chairman hian kut a thlak hmasa ber a, hemi hnu hian JCB hmanga laih chhunzawm nghal a ni.  Zobawka hun an hman zawh hian Lungpuizawl  mual laih mek HPC Vice Chairman hian a tlawh nghal a, Lungpuizawl mual hi cheng nuai 3 senga laih niin, tunah hian Metre 35 a zau, metre 70 a sei an lai zawl tawh a, a bak sum la mamawh tur hi ngaihtuah sak leh mek an nih thu Pu Lalhimpuia chuan a sawi.

HPC  Vice chairman inhun a hmanna ah hian Mizoram State  Sport  Council Vice Chairman Pu F. Rotluanga leh mipawimawh dang ten an tawiawm a, Pu F. Rotluanga chuan Lungpuizawla mual laih mek chu Mizoram chhunga Sport Department hmalakna zingah a sum nen ngaihtuah chuan a tha ber pawl nia a hriat thu a sawi bawk a ni.