Lunglei High Powered Committee bultumin Lunglei Traffic Police tihchangtlun nana hmanrua (equipments) hrang hrang lei a ni a, vawiin khan Lungei Tennis Court hmuna inkhawm neihah HPC Vice-Chairman Pu S.Laldingliana chuan heng hmanrua tharte hi Lunglei SP Pu Zosangliana kutah a hlan a. He Traffic Equipments inhlanna inkhawmah hian DIG(SR) Pu Joseph Lalchhuana, IPS chu Khualzahawm a ni a; Lunglei DC Pu Ashish Madhaorao More, IAS bakah Lunglei HPC member-te leh Department officials engemawzat an tel bawk.

Khuallian Pu S.Laldingliana chuan thusawiin YMA Sub-Hqrs Lunglei President a nih lai atanga an vei tawh, Lunglei khawchhunga mumal taka traffic rules kenkawh leh Traffic Police-te tihchangtlun chu sorkar duhsakna leh Lunglei High Powered Committee hmalakna zarah vawiinah a taka hmuh theihin a awm chho ta chu a lawmawm hle a ni, a ti a. Tun dinhmunah Lunglei-ah traffic chungchanga harsatna awm em em lo mahse hun rawn kal zelah mihring leh motor an pung zel dawn avangin tun atangin inhmakhuaa ruahmanna fel zawk siam hi a finthlak a ni, a ti bawk. Pu S.Laldingliana chuan Lunglei Traffic Police-te chu an hawihawmin duty-naah inthlahdah emaw zurui emawa hmuh tur an awm ngai lo chu an fakawm hle a, an mamawh leh an hmasawnna tur chu sorkar pawhin ngaihtuahsak zel a duh a ni, a ti. A sawi zelnaah Pu S.Laldingliana chuan Lunglei HPC chuan Lunglei District hmasawnna turin theihtawp a chhuah zel a, tunah pawh HPC bultumin power supply changtlung zawka Lunglei leh chhimbialin a hmuh theih nan Cheng nuai 380 sengin Kawmzawl-ah Sub-Station bun mek a ni a, Lunglei By-pass siamna tur Project pawh Chief Minister ngeiin No.1 Priority-a dah tura ziakin Planning Department-ah thehluh a ni tawh tih a tarlang a. Lunglei District chhungah Airport sakna tur hmun atana an thlanfel tawh mahse Airport Authroity-in survey an neihnaah remchan lohna a hmuh thin avangin hmun remchang tur dang zawn mek a ni a, aerial survey pawh neih tum hnai a ni, a ti bawk.

Khualzahawm DIG(SR) Pu Joseph Lalchhuana pawhin thu sawiin a hna thar zawma Lunglei-ah kar 3 a awm chhungin a hnuaia Police department peng hrang hrang hnawthawh danah lawmna tur tam tak a hmuh thu a sawi a, a bik takin Lunglei Traffic Police-te chu an duty-naah an inpekna leh an phurna a fakawm hle a ni, a ti. Mizoram sorkar leh HPC Vice-Chairman duhsaknain Lunglei Traffic Police ten hmanrua chi hrang hrang nena thuamthar an nih chu a lawmawm tak zet a, chuvangin Traffic Police-te pawhin mipuite tana an rawngbawlna kawngah theihtawp chhuah zel turin a chah a ni.

Lunglei DC Pu Ashish More pawhin thu sawiin khawvel hmasawn zelin a ken tel chu traffic harsatna hi a ni a, Aizawl khawpui pawh traffic tawt lutuk chuan harsatna tam tak a siam a, hun lo kal turah Lunglei khawpuiin traffic lamah harsatna kan tawh loh nan mumal zawka traffic management lamah tanlak a ngai a, hemi atan hian Police lam chauh ni lovin mitinte kan mawhphurhna a ni, a ti.

Lunglei SDPO Pu B.Laldingnngheta chuan Report pein Lunglei HPC-in Traffic Police hmanrua tharte bakah Police Department mamawh hrang hrang phuhruk sak nan Cheng  4,65,000/- a sen thu a tarlang a. Vawiina Traffic Police hmanrua pekte chu :

1. Reflective Hand Glove - 40 pairs

2. Traffic Light Button (Double Colour) - 10

3. Convex Mirror (40 inches) - 8

4. Micro Controller (Searchlight) - 11

5. Breath Analyser - 1

6. Spring Post (Divider) - 20

7. Reflective Tape (White) - 4

8. Reflective tape (Red) 9. barricade - 10

10. Xerox Machine for Lunglei PS - 1

11. Computer set with printer for Traffic Branch - 1

Heng bakah Lunglei Police-te hmalakna dangte pawh tarlan a ni a. Lunglei khawpui chhungah Traffic Signboard hrang hrang heng hmunah : ‘No Entry’ for HMV & MMV’ chu Zotlang, 3 Gate leh Sazaikawn-ah te, Mizofed bulah ‘No Entry for 407 LPK & above’ te, ‘Town Bus Stop’ signboard hmun 22-ah leh ‘Parking/No Parking’ Signboard pawh hmuh 20-ah dah a ni tawh a. ‘Zebra Crossing’ pawh Serkawn-ah hmun 3, Treasury Office peng leh Civil Hospita Northern Gate-ah te dah a ni a; AOC atanga Serkawn inkarah Motor Parking-na hmun tur pawh engemawzat siam a ni tawh bawk a ni.

Vawiina Lunglei HPC atanga an dawn Convex Mirror te chu heng hmunahte hian dah tum a ni :- Falkawn, Ariculture Complex peng (both sides), Sacred Heart School peng, Lunglawn (Pu Thakima In bul), Salem Veng peng, Bazar veng (Pu Hmingliana In bul) leh Pukpui Junction te a ni.