Vawiin chawhnu khan Pu S. Laldingliana, MLA & Vice Chairman, High Powered Committee (HPC) Lunglei chuan HPC kaltlanga Rs. 145 lakhs senga sak Multi Utility Building chu Lungleiah a hawng. Hawnna inkhawm ah hian Lunglei DRDA Project Director Pu K. Lalrohlua leh sawrkar official dang te, HPC member-te, MJA President leh hruaitu dangte, tlawmngawi pawl hrang hrang aiawhte,  khawltang hruaitute leh mipui thahnem tak an kalkhawm.

Hawnna inkhawm Pu Andrew Lalhruaia, DUDO Lunglei kaihhruaiah Pu S. Laldingliana chuan Multi Utility Building changtlung tak chu Lunglei tan hmasawnna rahbi thar pawimawh tak a ni tiin a hming vuah a nih angin kawng hrang hranga  mipuite tana tangkai tura buatsaih a ni, a ti a.  A hnuai (basement) chu Maxicab parking na tura ruahman niin a chung chu sa leh thlai chawhmeh zawrhna tura buatsaih a nih thu a sawi a. Mipui kalkhawmte chu neitu thinlung pu tur leh heng hmasawnna ruhrel te dimdawi tak leh duat taka enkawl zui turin a chah a ni.

Pu S. Laldingliana chuan Lunglei District ti hmasawn zel tura HPC hmalakna hrang hrang te sawilangin Department hrang hrang office building, quarter engemawzat leh Rest House te HPC kaltlanga sak niin tangkai taka hman mek an ni, a ti a. HPC Budget pangngai atanga hmasawnna hna hrang hrang thawh mek a nih bakah HPC dil angin Lunglei Bypass Road vaibelchhe 10 sengin hna tan a ni dawn a, NEDP kaltlangin Lunglei khawpui venhimna tur CCTV Surveillance Project tan thuai a nih tur thu a sawi bawk. Hemi bakah hian Lunglei Police Station bul kawngpuiah Pedestrian Flyover ruahman tum a nih thu leh Slaughterhouse panna kawng approach road siam that thuai a nih tur thu HPC Vice Chairman hian a tarlang bawk.

Pu T Ramropuia, Junior Engineer, UD&PA chuan Technical Report a pe a.  Multi Utility Building zau zawng hi 9148 square feet a ni a. 1st Basement hi 2090 sq ft a zau niin storeroom a hman tur a ni a. 2nd Basement hi 3529 sq ft a zau niin Maxi Cab 16 din theihna parking area leh Sumo Counter 2 bakah toilet 8 a awm a. 1st Floor hi 3529 sq ft a zau niin sa leh thlai chawhmeh zawrhna tura ruahman a ni. A chung hi sak chhunzawm zel tura hmalak mek niin thingtlang atanga VC leh  midang zin te tana thianghlim taka an thlenna tura siam a ni dawn a ni.

Attachment

  • Loading attachment...