Vawiin chawhma khan School Education Director Pu K. Lalthawmmawia, IAS hovin a pisa-ah IIT JEE/NEET online coaching kalpui dan tur sawiho a ni.
Pu K. Lalthawmmawia chuan zirlaite chu scholarship dawng pha chin an nih theih nan theihtawp chhuah turin a duh thu a sawi a. IIT JEE/NEET online coaching chu zirlaite hmang tangkai tura beisei an nih thu a sawi. Meeting-ah hian IIT-JEE/NEET online coaching programme Higher Secondary School-a kalpui dan tur uluk taka sawiho a ni a, ruahmanna hrang hrang siam a ni bawk.
MYC hmalaknain IIT-JEE/NEET online coaching hi Aizawl-ah school pathum St. Paul’s HSS, Govt. Mizo HSS leh Govt. Republic HSS, Lunglei-ah Govt. Lunglei HSS leh Baptist HSS-ah Satellite khawl (VSAT) bunin Aizawlah zirlai mi 200 leh Lunglei-ah mi 100 hnenah online coaching pek an ni ang. Heng bakah hian Alternate Learning System (ALS) (Coaching Centre) bultumin Scholarship Scheme zirlai naupang 100 tan exam kumin July thla chhung hian buatsaih a ni ang.
Higher Secondary School dang zirlai tan pawh online coaching a kal theih vek a, luh tumte tan Entrance exam buatsaih a ni ang. Online coaching hi thawhtanni atanga zirtawpni tlai dar 4 atanga dar 6 inkarah kum khat chhung neih tura ruahman a ni.
Vawiin meeting-ah hian School Education Department hotute, MYC hotute, ALS (Coaching centre) hotute, leh Govt. Higher Secondary School Principal te an tel a ni.
