2017/2023-2024

Vawin ni 26.September, 2023(Thawhlehni) hian HRD Board Vice Chairman Dr. L.Thangmawia chuan MSSSB leh MPSC office te a tlawh a, MSSSB office-ah hian MSSSB Chairman Pu C.Lalhuliana, Member Pi H.Vanlalchuangi leh Secretary Pu David Lallawmkima Fanai ten lo dawngsawngin MSSSB hmalak tawhna leh hmalak mek bakah hmachhawpte an lo hrilhfiah a. MPSC Office-ah hian MPSC Chairman Pu J.C.Ramthanga leh Secretary Pu Vanlalmawia MCS ten lo dawngsawngin MPSC hmalakna leh hmasawnna te an lo hrilh bawk.

MSSSB hotute chuan kum 2020 atanga office luaha hnathawk tan an nih thu te, Direct recruitment mi 243, LDE mi 288, Departmental Exam mi 216, Promotion mi 2906, Regularisation mi 122, confirmation mi 1366, conversion mi 47 leh absorbtion mi 43, a vaiin mi 5,231 lai te an tih fel sak hman thu an lo sawi a. Hna hrang hrang 18 lakna atan exam buatsaih an la hmabak mek thu leh hna pali atan exam ni 28-29, September-ah an neih dawn thu leh a ang hna 14 atana exam hun tur erawh an la tih fel rih loh thu MLA hi an lo hrilh a ni. An harsatna leh hmachhawpte lo sawiin office thar an nih anga hmasawnna tur tam tak la nei mahse theihtawp chhuaha Mizo thalai hna zawng laite tana an thawh zel tur thu an lo sawi bawk a ni.

MPSC hotute pawhin MPSC office thuam that nana Mizoram sawrkarin cheng nuai 460.28 zet tunhnaia a pek hmanga office an thuamthat meke lo enpuiin hnalak dan tha zawk leh mumal zawk an duante chu Mizoram sawrkar pawmpuina an hmuh tawh thu leh chutiang ang chuan kum thar atang chuan Combined Examination hrang hrang – Mizoram Engineering Service, Mizoram Health Services, Annual Examination for Group ‘B’ (gazette) Posts leh Agriculture & Allied Services(technical) Examination te nei tura an inuatsaih mek thu lo sawiin MPSC Evaluation and Scrutiny Guidelines, 2022 leh MPSC (Examination) Guidelines, 2023 te peihfel a nih tawh thu te, tun MLA term kal lai mek chhung hian Post hrang hrang 81 atana hna thar lak hlawhtling taka an zawh tawh thu leh Post 6 atana advertisement an chhuah mek thu te, Post dang 13 buaipui thar tur sawrkar lam atanga an dawn mek thu an lo sawi bawk. MPSC in exam a buatsaih reng rengah Mizo tawng Middle School standard qualifying exam atan a tel zel tawh dawn thu an lo sawi bawk a ni.

Heng office pahnih a tlawhnaah hian thusawiin Dr Thangmawia chuan, “Central sawrkarin hna sang zawk la turin UPSC leh hna hniam lam la tu tur Staff Selection Commission(SSC) a neih ang dungzuia Mizoram sawrkarin hnasang lam (Group A & Group B Gazette) la tura MPSC a din tawh bakah a hnuai lam atana MSSSB rem hre taka a din hi Zoram thalai lehkhathiam, hnazawng laite tan thil lawmawm tak a ni,” a ti a.

Dr.L.Thangmawia, HRDB Vice Chairman chuan, “Mizoram sorkar hnuaia hnalak chungchangah MSSSB leh MPSC te chu in la hming tha hle in kan lo hria a, in hnalak danah sawiselna tur awm lo va a tling tlak zel la chhunzawm zel turin duhsakna ka hlan che u a, Zoram thlai lehkhathiam leh Zoram mipuite tana in hnathawh rawn zir chiangin a nakah ka rawn zen a ni,” a ti.

Dr.Thangmawia chuan Covid hripui leng karah MSSSB in Zoram thalai leh sawrkar hnathawk mek mi 5231 zet te bung thar a kaipui hman chu thil lawmawm tak a ni a ti bawk.

HRD Board Vice Chairman hi Pu Lalrinawma Khiangte MCS, Development Officer, SRDC leh MNF thalai hruaituten an tawiawm a ni.