1860/2023-2024

Aizawl, 13th September, 2023 : Vawiin chawhma khan Lengteng bialtu MLA Dr L.Thangmawia chuan NHIDCL Executive Director Pu V.Jakhara chu a office-ah tlawhin NHIDCL hmalakna hrang hrang a sawipui.

Dr Thangmawia chuan a bial chhung kaltlang, Manipur pawhtu kawngpui NH 102B chu Manipur a zofaten chak lak nana rinpui bera an neih mek avangin motor tlan a tam a, kawng a chhe chak hle tih thu te, hetih laia a ngenna ngai pawimawha NHIDCL-in a theih ang ang a chei that hna an thawh zel avanga lawmthu hrilhin ngawrh zawka vil a tul thu leh fur zawh veleh thazawka kawngpui hi siam tha nghal turin a ngen nghal bawk. Pu Aichhinga Road(Puilo to Tuichang) in National Highway a pawhna tun thlenga la siam loh chu a hriatthiam loh thu te, Ngopa in kum thar 2024 March thlaa KTP General Conference a thlenna tura pandal structure phurh dan turte a sawipui bawk.

Pu Jakhar-a chuan ruahtui a tlak nasat avang leh motor tlan a tam avanga NH 102B kawng chhe thawm that hna duh anga a chak theih rih loh thu leh amah ngeiin a hmuna kala kar leha a endik tur thu MLA hi a hrilh nghal a. Pu Aichhinga road junction pawh a contractor te phone a be nghalin a rang thei anga Puilo VCP hriatpuinaa siam turin a hrilh nghal a. KTP khawmpui pandal pawh phurh theih anih veleh ruahmanna a theih anga a lo siam tur thu MLA a lo hrilh a ni.

Pu Jakhar-a chuan Highway laih kawnga Mizoram sawrkar kaihhnawiha harsatna an la neih te Dr Thangmawia hi lo hrilhin MLA chuan a rang thei ang bera Chief Minister Pu Zoramthanga a lo sawipui tur thu Executive Director a hrilh bawk a ni.

MLA hi Ngopa KTP General Conference 2024 Organising Committee aiawhin Pu K. Lianhmingtanga'n a tawiawm a ni.