1861/2023-2024

Aizawl, the 13th September, 2023: Mizoram Sawrkarin Mizoram Journalist Association (MJA) thite ralna a pek thin, ex-gratia chu vawiin chhun khan MJA member 3, Accredited Journalist 2 leh MJA member dang 1 chhungte hnenah I&PR Minister Pu Lalruatkima chuan a hlan.

He hunah hian Accredited Journalist 2, December ni 2, 2022 a boral Pu Alfred Vanchhawng, Stringer, DDK Aizawl, Executive Member, MJA (Hqrs) Aizawl leh December ni 27, 2022 a boral Pu V. Zoramthara, News Reporter, LPS Vision chhungte hnenah Ex-gratia Rs 1,50,000/- hlan niin, Journalist member dang May ni 23, 2023 a boral Pu E. Lalhleia, Editor, Aizawl Observer chhungte hnenah ex-gratia Rs 1,00,000/- hlan a ni bawk.

He hun hmanpuitu I&PR Minister Pu Lalruatkima chuan Chanchinbumi sun takte a ui tak zet thu leh an kalsan chhungte a tawrhpui thu a sawi a. Mimal taka a hriatchiante leh sulhnu pawimawh tam tak hnutchhiahtute an nih thu sawiin, an sulhnu chhinchhiah tlak tak takte chu hriatreng a ni tawh dawn a ni, a ti. Sawrkarin Journalist tan hamthatna engemawzah a chhawpchhuah thu sawiin, Mizoram Journalist Welfare Scheme hnuaiah kum khat atan cheng nuai 20 a dah thu leh hei hi damloh nikhuaa medical bill atan leh ex gratia atana hman thin a nih thu a sawi a. Journalist Pension Scheme chungchanga hmalak dante tarlangin, a hlawhtlin theih nan theihtawp chhuah mek a nih thu a sawi bawk.

Mipui leh Sawrkar inkara palai hna thawktu pawimawh tak I&PR Department leh MJA te chu inghneng tlat an nih thu tarlangin, social media kaltlanga thu belhchian dawl lo vawrhdarh thinte ven leh thudik puanchhuah kawnga hmalakho zel a pawimawh thu a sawi a. Mipuite kawng dik kawhhmuha zirtirna dik pek kawnga hmalak hi kan mawhphurhna a ni, a ti a. Lehkha chhiar tam intihhmuh a tul thu leh uar zawka chanchinbu chhiar tura inzirtir a pawimawh thu a sawi bawk a. MJA in kum 50 na hial an thleng thei chu lawmawm tiin, member-te chu hruaitu hmasate inpekna chhawmnung zel turin a fuih a. Zonun zemawi zirtirna pek kawngah leh Sawrkar thu leh hla puanzar kawnga tan la zel turin a chah a, midangte fuihphura finchhuahtu nih tum turin a chah nghal bawk.

MJA member thite ralna hun I&PR Auditorium-a hman hi I&PR Director Pu C.Lalnunkima chuan kaihruaiin MJA member boral-te Department-in uiawm a tih thu a sawi a. An chhungte chu harsatna an tawhte leh mamawh an neihte inthlahrung hauh lova Department lama thlen thin turin a chah bawk.

He hunah hian I&PR Department thawktute, MJA member leh mithi chhungte an tel a. Sunna hun tawi hman a nih hnuah member thite chanchin tlangpui MJA Hqrs. Aizawl President Pu C.Lalrambuatsaiha hnen atangin ngaihthlak a ni a. Mitthi chhungte atangin thusawi ngaihthlak a ni bawk.

Mizoram Sawrkar chuan Accredited Journalist thite Rs 1,50,000/- leh Non-Accredited Journalist thite Rs 1,00,000/- in a ral thin a ni.