Union Minister for Human Resource Development Kapil Sibal chuan vawiin khan Lengpui YMA hallah National Institute of Tec hnology (NIT) Mizoram Campus dinna tur lungphum a phum.

Kapil Sibal chuan NIT Mizoram campus din thei tura Lengpui khawtlangin ram an pekah lawmthu sawiin,  a siam hna pawh bul tan thuai a ni ang a ti a. A satu tur atan pawh rintlak leh belhchian dawl, Public Sector Organisation atangin a ni ang a ti. He NIT campus hi khawvela technology institute tha ber el phak, world classa siam a ni ang a ti a. 'Chutianga tha  in nei tur hian piang nawn leh thei ni ila Mizo nih ka chak ber ang' a ti.

Kapil Sibal chuan north east ah hausakpui theih thil tam tak a awm a, hengte hi thalaite tan non traditional sectorah hamthatna tur siam sak a pawimawh a ni a ti a. India ah thalai kum 14 hnuailam maktaduai 400 chuang an awm a, chhawr theih leh hman tlaka kan siam hi kan mawhphurhna a ni a ti a. Ramin a mamawh, ramdang atanga kan chawkluh reng, oil leh gas ah Mizoram chu a hausa a, hemi lama hna thawk turin pawnlam state atanga lakluh ngai lova,a hna tam zawk  leilung faten an thawh theihna turin Mizoram University hian kum 2014 hma ngeia oil leh gas lam zirna certificate leh diploma course tal siam (introduce) turin Vice Chancellor awm ve chu a hrilh a ni.

Union Minister chuan ram chhunga zirna in zawng zawng chu Optic Fibre Cable (OFC)Network hmanga thlunzawm vek tum a ni a ti a. OFC hi leihnuaiah phum lovin lei chunga thlun a ni ang a ti a. Hei hian international highway siamin Mizoram pawh thlun zawm a ni ang tiin, zirna lam chauh nilo, hriselna lam te, sumdawnna lamah te leh thil dang tam takah kan tangkaipui ang a ti. Hemi bakah National Knowledge Network pawh siamin. zirna in 33,000 leh zirna sang zawk 660 vel thlunzawmin, nakum 2013 chhung hian Mizoram pawh rawn thlun zawm ani ang a ti a. Science lam zirnaah Minister chuan course 1000 chuang siam tum a ni a ti bawk a. Mizoram thalaite chu ramchhung hmun dang University ah te inthehdarh a, midangte culture zir chungin an mahni culture pawh pholan nan hmang se a duhthu a sawi bawk a ni.

Chief Minister Pu Lal Thanhawla chuan Presidential Address a neihah science and technology lama ramin hmasawnna a neih chu hmarchhak state te pawhin hamthatna kan dawng ve mek a ni a ti a.NIT Mizoram Campus dinna tur lungphum phum chu kan tan mellung pawimawh tak a ni a ti a. HRD Minister ngeiin a rawn phum hi kan vannei hle a ni a tiin, a kaihhruainain kum 2010 ah NIT 10 din a ni a, ram rohlu ber, ami chengte chawikanna ah nasa takin hmasawnna kan hmu a ni a ti a. NIT Mizoram hi a din tirh atanga mimal in luahhawha kalpui anih avangin, zirlaite tana tha zawk tur campus neih thuai hi a nghahhlelhawm a, chuvangin a sak hna bul tan thuai turin Union Minister hi a ngen nghal a ni.

Chief Minister chuan NIT Mizoram dinna kawnga hmahruaitu,Ashok Thakur, tuna HRD Ministry a Secretary te, K.Ravi Kumar, Chairman, Board of Governors for NIT Mizoram leh Prof. U.C.Ray, Director NIT Mizoram te hnenah lawmthu a sawi bawk a. Union Minister Kapil Sibal chu Lengpui thleng chauh a rawn kal avangin, Chief Minister chuan a rawn kalleh hunah chuan chawlh hmang tura lokal tu rin a sawm a, Mizoram leilung leh boruak te, ami chengte nunphung leh kan khualchhawn dan mawi takte ataka rawn hmu turin a sawm a ni.

Chief Minister hian Union Minister Kapil Sibal hnenah NIT Campus sa tur hian M/S Hindustan Steel Works Construction Ltd chu thlang turin a rawn a. Mizoramah ruahtui tam vang leh leimin a tam avangin tuna Railtel Company in OFC  phum hna a kalpuinaah harsatna a awm thin avangin, phum lova lei chunga kalpui turin a ngen a. Powergrid Corporationin lei chunga OFC a kalpui mek chu Mizoram chiah hi anla zawh lohna state anih vangin hmalakpui turin a sawm bawk a. Software Technology Park nei tura Mizoram University nen MoS an ziah tawh chu chak zawka kalpui turin a ngen bawk a. Engineering college a kan thalai ten a hun taka an zir theih nan seat allocation a hma thei anga min tih fel sak turin a ngen bawk a ni.

NIT Mizoram Board of Governors Chairman K.Ravi Kumar chuan Campus sak hna tan thuai a ni ang a ti a. Pu C.L.Ruala, MP (Lok Sabha) chuan NIT Mizoram hi malsawmna tam tak a thlen ngei a beiseiawm ani a ti a. Petroleum degree course siam thei se a duhthu a sawi bawk. Pu Lalsawta, Higher Education Minister chuan hetiang hnam rotling NIT ataka kan nei thei hi HRD Minister Pu Kapil Sibal hmalakna rah a ni a, amah ngeiin a lung a rawn phum hi a lawmawm tak zet a ni a ti.

Lungphum phumna inkhawmah hian Ministerte an kal tha hle a, a hall ruahman dan leh inkhawm kaihhruai hna hi NIT Zirlai leh Faculty member ten an buaipui vek a ni. Union Minister hi Pi Ameeta Sharma, Addl Secretary, Ministry of HRD in a rawn tawiawm bawk a ni.

Union Minister hi Guwahati atangin Helicopterin a rawn kal a, lungphum inkhawm zawhah Nagaland panin a kir leh nghal a ni.