Ni 10.10.2012 khan Chawngte CADC Conference Hall-ah Pu NK Chakma, Minister AH& Vety etc. hovin Chakma Autonomous District Council (CADC) hotu te, Lawngtlai District NLUP Lines Department, NLUP Implementing Board hotute leh NGO ten meeting an nei.

He hunah hian Pu NK Chakma chuan NLUP chu Mizoram Flagship Programme anih angin, Mizoram department zawng zawng, CADS a thawkte leh NGO ten a hlawhtlinna turin theihtawp chhuah a ngaih thu a sawi. Beneficiries te pawhin NLUP an dawn chu dawng ringawt lova, rinawmna leh taimakna nen chhungkaw eizawnna nghet siam turin theihtawp a tan an lak a ngai tih a sawi bawk.

Lawngtlai District NLUP Lines Department hotuten report an pe theuh va, tun thleng a hma an lak chinah chuan lawmawm an tih thu an sawi a, harsatna an tawh hrang hrangte pawh an tarlang bawk.

Pu Kali Kumar Tongchangya, Chief Executive Member, CADC chuan kalkhawmte lawmna thu sawiin, Lines Department ten an harsatna kawng, inkal pawhna thalo avanga Monitoring an tih that theih loh chu an council hnuaia thawkten an lo puih tur thu leh Chakma tawng an thiam loh avanga beneficiaries te nen an inhrilh fiah theih loh chungchang pawh lines department hotuten an zin vahna ah an mamawh anga tawnglettu (interpreter) pek an nih tur thu a sawi.

Chawhma session meeting hi Pu Rinliana, SDO (C) Chawngte chuan a kaihruai a, Pu Lalvenhima, SDC, Lawngtlai District Nodal Officer nibawk chuan lawmthu sawina a nei.

Chawhnu session chu Committee Hall, Kamalanagar III ah neih niin, CEM, CADC in a kaihruai a, Pu Nirupam Chakma bialtu MLA chuan thu sawiin, hun kharna Pu David L. Thangliana, Chief Media Officer, NLUP Media Cell chuan a nei a ni. Hetah hian NLUP tanpuina AH & Vety Department leh Horticulture atangin sem a ni bawk.