Vawiin khan Directorate of Health Services Conference Hall-ah Principal Director, Health & Family Welfare Department kaihhruaina in NITI Aayog hnuaia Aspirational District atana thlan Mamit district chungchanga department hmalakna te DHS Conference Hall ah sawiho a ni a. Hriselna kawnga he District in hma a sawn theih nan Mizoram sawrkar chuan theihtawpin tan a la mek a ni.
National Institution for Transforming India (NITI) Aayog chuan India ram puma states 28 a district hnufual bik 115 a thlan zingah Mizorama districts 8 zing a mi Mamit chu thlan tel a ni a. District hnufual thlan nan hian hmasawnna teh nana tehfung hman tlanglawn – hriselna, nitin eizawnna, power supply, zirna lam, tui supply, inthiarna tha, etc. – te hman a ni. Heng district thlan chhuah te hian hma an sawn chuan, United Nations Development Programme (UNDP) in Human Development Index (HDI) a tihchhuah thin ah pawh India ramin hma a sawn theih beisei a ni a. Tun dinhmunah India hi ram 188 zingah 131 na a ni.
NITI Aayog in a beisei dan chuan heng Aspirational Districts thlan chhuah te hi state tin sawrkar ten ngai pawimawhin District Vision Document & Action Plan 2022 district atanga siam te tihhlawhtlin a tum tur a ni a. Health & Family Welfare Department pawhin Action Plan siam tawhin Mizoram sawrkarah a thehlut tawh a ni. NITI Aayog in hriselna (health) leh nutrition zawna Aspirational district tehna tur indicators 30 a thlan chhuaha hmasawnna nei thei turin hma lak mek a ni a. Health and Nutrition Indicators te hi a tlangpui thu chuan – nu naupai in enkawlna (antenatal care), nu hriselna (anaemia), nau neihna hmun (institutional delivery), nau chhartu (skilled-birth attendance), nau hnute pek, naupang hriselna (nutrition kaihhnawih), hritlang leh kawthalo enkawlna, hridanna, TB enkawlna, Sub-centre te tihchangtlunna (health & wellness centres), Anganwadi te tihchangtlunna leh Indian Public Health Standards (IPHS) in a duan anga PHC leh District Hospital-a thawktu dah te a ni.
Tun dinhmunah chuan Mamit district hi Mizorama district dang te aiin kawng tam takin a hnufual a. Health & Family Welfare Department in hna a thawhna ah chuan manpower neih changtlun hi a pawimawh hle a. District Hospital, Mamit ah hian tun dinhmunah hian Specialist – 6 an awm a. Heng zinga 3 te hi tun hnaia dah thar an ni. Medical Officer awm lohna Primary Health Centre (PHC) 1 a awm bawk.
June ni 1 atanga August ni 15, 2018 chhung hian Extended Gram Swaraj Abhiyan (EGSA), Ministry of Panchayati Raj hnuaia Aspirational Distrit, Mamit ah hman a ni dawna. Hetah hian Health Department lam atang chuan hridanna (Immunization), PHC thlanchhuah te tihchangtlun nan leh TB natna enkawlna lama beihpui thlak nan te hman tum a ni.
Health & Family Welfare Department, Government of Mizoram chuan Mamit district tana programme hrang hrang te hnathawh uluk takin a endik reng dawn a. Indicators thlan chhuah te leh department in tul a tih anga a belh te hmangin hmasawnna teh a ni dawn a ni.
Aspirational Districts hrang hrang te dinhmun hi NITI Aayog online interactive portal niti.gov.in/content/aspirational-districts-baseline-ranking-map ah en theih reng a ni.
