Vawiin chawhnu khan Planning Minister Pu Lalsawta chuan a office-ah Planning, Finance, Taxation, Revenue, Law & Judicial leh General Administrative Department hotute leh District Bawrhsap te chu kawmin sawrkar hmalakna pawimawh thenkhat a sawipui a. He meeting-ah hian Finance Minister chuan NEDP hnuaia 'My Project, My NEDP - Mipui Mamawh Intawm Ruahmanna(MiMIR) kalpui mek te, sawrkar hnena chhiah leh sum tam tak ba mek te chungchang bakah Sawrkarin mimal thlai huan/ram neitute hnena zangnadawmna sum tamtak a pek thin tih ziaawm dan tur te ngaihtuahho a ni. 

Meeting kaihruaitu Planning Minister Pu Lalsawta chuan  MiMIR chu khua leh tui ten neitu thinlung pua an chenna khua leh veng mipui mamawh tlan leh intawm theih,  hmasawnna ruhrel dinna tur Public Infrastructure Asset project,  sawrkar programme pangai atanga siam zen zen loh ang chi dinna tur a ni a. He project-ah hian District tina khaw tin te chu project thaber siamin an in el anga, project tha ber hi District Bawrhsap hovin MiMIR Committee chuan a la thlang leh dawn tih a sawi a. MiMIR tan hian Rs 8 Crore ruahhman a ni a, Rs 1 Crore zel District pakhat tan ruahman a ni a ti.

Bawrhsap-te thuneihna huanga mi - sawrkar sum rul tha duhlo leh chhiah pe duh lote hnena atanga sum emaw an neih thilhlu te laksak chungchangah District tina Bawrhsap-te tan la thar turin a fuih a. " Sawrkar chu mipui ta a ni a, sawrkar sum pawh mipui sum a ni a, sawrkar hnena chhiah chhung tha duh lo leh pawisa ba, sum tak tak hu  pe duh lo mi thenkhatte chuan mipui sum an bat hi an rulh ngei a ngai a, an leiba te hi The Mizoram Public Demands Recovery Act, 2001 hmanga thin theih an ni. Sawrkar chuan mipuite tan project siam te, hna tam zawk thawhte a duh avangin sum a mamawh a, heng leiba te hi hmuhkir a nih theih nan chak takin hmalak a ni ang", a ti. Finance Department Minister ni bawk Pu Lalsawta insakna atan bak Village Council Pass, VC ten an pe thei lo tih leh thlai huan atan phei chuan pek theih a ni lo tih Court thutlukna a awm chungin Bawrhsap thenkhat ten huan neitute tan compensation an dil luih pui thin chu ti tawp a nih theih nan tan lak a tul tih a sawi a. Huan thlai chungchangah sawrkarin compensation award-ah sum tam tak a seng thin chu tih tawp a ngai a ni a ti. 

MiMIR chungchangah Planning Secretary Dr C.Vanlalramsangachuan report a pe a. MiMIR Project siamna  atan hian District tinah cheng vaibelchhe khat ruahman a ni a, district tina khua zawng zawngte mipui mamawh intawm project/concept note siama inelna buatsaih tur a ni. He inelna Concept Paper thehluh ni hnuhnung ber chu July 16, 2018 a ni. He mi atan hian MiMIR Joint Committee Local Council/Village Council Court, YMA, MUP, MHIP te telna din theuh tur a ni a. He Joint Committee kaltlang hian Concept Note mahni District Deputy Commissioner theuhah theh luh tur a ni. He ta a ti tha ber theuh hnenah an project kalpui na  atan cheng vaibelchhe khat theuh pek tur a ni. 

Land Compensation kaihnawih chungchangah Court thutlukna leh sawrkar hmalak theih dan Law & Judicial Secretary Pi Marli Vankung chuan sawizauna hun a hmang a. The Mizoram Public Demands Recovery Act, 2001 hmanga Bawrhsap-te thuneihna a sawifiah bawk a ni. The Mizoram Public Demands Recovery Act, 2001 hnuaiah hian Bawrhsap-ten dan ang thlapa sawrkar leibatute thing thei tur leh leiba rul tha duhlote thil neih chhuhsak theihna thlenga thuneitu, Certificate Officer te District tinah an ruat vek tur a ni. 

Planning Minister hova MiMIR, Mimal leh sumdawngte hnena sawrkar sum tang laklet leh land compensation tih tlem  chungchang sawihonaah hian Finance Principal Secretary Pu Lalnunmawia Chuaungo, Taxation Commissioner & Secretary Pu Vanlal Chhuanga, Aizawl Bawrhsap Dr.A.Muthamma, Champhai Bawrhsap Pu Vanlalngaihsaka, Serchhip Bawrhsap Pi Sangchin Chinzah, LR &S Director Pu C.Lalpeksanga, Pu Vanlalmawia, JS, GAD leh Pu David L Thangliana, Director, I &PR te,  Lunglei, Saiha, leh Kolasib Bawrhsap aiawhte bakah kaihhnawih Department Official te an tel a. Meetingah hian ruahmanna thazawk te leh hmalak chhunzawm zel dan tur chipchiar taka sawiho a ni.