Information & Public Relations Department leh Mizoram Film Forum (MFF) tangkawp buatsaih ‘Mizo Short Film Competition 2018’ chu vawiin khan I&PR Auditorium-ah a kharna neih a ni a; Planning & Programme Implementaion Department Secretary Dr.C.Vanlalramsanga chu Khuallian niin lawmman a sem. 

Mizo Short Film Competition 2018 lawmman semna inkhawm I&PR Director Pu David L.Thangliana kaihhruaiah Khuallian Dr.C.Vanlalramsanga chuan film-in mimal leh khawtlang nun nasa takin a nghawng theih avangin a tha zawnga Mizo film hmasawnna awm theihna tur sorkarin a ngai pawimawh hle a ni, a ti. Mizoram leh hnamze mawi te khawvel hmuh theiha phochhuah a nih theih nan leh tourism lamah pawh khaulzinmiten Mizoram an tlawh chakna turin Mizo film siamtute pawhin tan la turin a fuih a. Mizoram-ah film hmasawnna awm zel theihna tur leh film siam leh channa lamah eizawnna ngelnghet awm zel theihna tura I&PR Department hmalakna te fakin Dr.C.Vanlalramsanga chuan sorkarin ‘Film City’ changtlung tak Mizoram-ah ngei din a nih theih nan theihtawp a chhuah mek zel a ni, a ti bawk.

I&PR Jt Director leh Nodal Officer, Film Development Pi Lallianpuii pawhin thu sawiin kumin ‘Mizo Short Film Competition’ atan film 17 lai thehluh a nih thu te, Aizawl bakah district lam te pawhin rawn ngaihvenin Kolasib atangin film thehlut an awm thu te, film siamtute bakah KTP leh YMA lamin an film tawi siamte pawh an rawn thehlut chu a lawmawm takzet a ni, a ti a. Hun bituk liam hnua film tha tak tak rawn thehlut tum awm mahse hun a lo tlai tawh avangin hnar an ngai ta chu pawi a tih thu sawiin Pi Lallianpuii chuan Film Competition buatsaih a nih leh hunah tun aia tam rawn thehlut theih turin tun atangin film siamtute chu lo inpuahchah turin a hrilh a. India ramah khawvel huapa International Film Festival neih thina chhuah theih turin Mizo Film thate thlang chhuakin dubbing leh sub-titles pawh buaipui mek a nih thu a sawi a. Mizoram sorkar, a bik takin Planning Department lamin Secretary Dr.C.Vanlalramsanga hovin, film siam hi Mizo thalaite tana eizawnna tha tak a ni thei a ni tih hriain theihtawp an chhuahpui thin avang leh sum lamah pawh theih ang angin duhsak an nih thin chu a lawmawm takzet a ni, a ti bawk.

Mizoram Film Forum President Pu Lalawmpuia Khiangte pawhin thu sawiin sorkarin film hmasawnna tur a ngaihsak avangin hun reilote chhungin Mizo film industry chu nasa takin a thang mek a; nodal department I&PR kaltlangin Training leh Workshop huaihawt a nih thin chu an tangkaipui hle a ni, a ti. Mizote chuan ‘film changkang’ ai chuan  chhungkua leh mitinin an en ngam tur, hmuhnawm an tih leh an hlawkpui tur  ‘film tha’ siam lamah tanlak a ngaih thu a sawi bawk.

Mizo Short Film Competition 2018 Judge pahnih -  Pu Lalsawmliana Pachuau, Proprietor, LPS leh Pi Irene Lalruatkimi, HoD, Mass Comm. MZU te pawhin thu sawiin film siam dan (technique) leh a lemchan (acting) lamah pawh Mizote chu nasa takin hma an sawn nia an hriat thu leh sorkarin an buatsaih thin Workshop/Training chhuak ngatte phei chu an film siam leh an chan danah a hriat hle a ni an ti bawk.

'Mizo Short Film Competition 2018' lawmman dawngte chu a hnuaia mite an ni :-

Winner : ‘RINNA’ (Director - Aldrin Zosangliana)

1st Runners-up : ‘PIALRAL AH’ (Director - Napoleon RZ Thanga)

2nd Runners-up : ‘CHEMI LEH TLANGCHHUANA’ (Director - Lalrinmuana)

Best Director : Aldrin Zosangliana, ‘Rinna’

Best Editor : Albert Zosangliana, ‘My Angel’

Best Cinematography : Aldrin Zosangliana, ‘Rinna’

Best Story : Lalrinmauana, ‘Chemi leh Tlangchhuana’

Best Actor : Robinson Sailo, ‘Pa’

Best Actress : Lalhmingmawii, ‘Chemi leh Tlangchhuana’