Vawiin khan DISHA Chairman Pu CL. Ruala, MP Lok Sabha hovin kumin Financial year-a a vawikhatna atan District Development Co-Ordination & Monitoring Committee (DISHA) thutkhawm a ni a. Sorkar laipui hnuaia District chhunga Scheme hrang hrang enletna leh thlirhona neih a ni.

DISHA Chairman Pu CL. Ruala chuan Meeting-na a kalkhawmte chungah lawmthu sawiin Sorkar laipui atanga hnathawhna tur sum kan hmuh thinte chu a tha thei ang ber leh ram tana rohlu a nih theih nana thawk turin a enkawltu Officers kalkhawmte chu a chah.

Meeting-ah hian District Rural Development Agency hnuaia Scheme MGNREGA chu Empowerment Committee-in Ni 79 thawh tura a Sanction atangin April thlaah Ni 14 thawh niin May thlaah Ni 14 bawk thawh a ni a. June thlaah Ni 6 chhung thawk leh tura inbuatsaihna kalpui mek a ni bawk. Pradhan Mantri Awaas Yojana - Gramin ( PMAY-G) hnuaia Block hrang hrang chhunga khaw tihhmaihte chu a ranglama High level-ah ennawntir turin hmalak nise tih Committee-ah hian rawt a ni a. Heng khaw hmaihte hi Socio- Economic & Cast Census (SECC) tih hunlaia hmaihte an ni. PMAY-G Scheme hnuaiah hian Kum 2016-17 atan In 117 sak a ni a, hemi hnu atang hian sum hmuh a la nih leh loh thu Meeting-ah hian tarlan a ni bawk.

Swachh Bharat Mission (Gramin) hnuaia Individual Household Latrine (IHHL) chu PHE Department in 3497 sain DRDA nena tangkawpin (convergence) ekin 430, avaiin 3927 sak a ni a. Solid & Liquid Waste Management ( SLWM) hnuaiah bawlhhlawh sawngbawlna Kawrthah khuaah sak zawh tawh niin khaw dang pangaah sak mek a ni. Community Sanitary Complex (CSC) hnuaiah vantlang inthiarna Darlak Bazar leh Dapchhuah Bazar-ah sak zawh tawh niin hmun dang pasarihah sak mek a nih thu Meeting-ah hian tarlan a ni.

National Rural Livelihood Mission (NRLM) hnuaia BDO-te hmalakna hrang hrang tarlan a ni a. Zawlnuam RD Block-a Self Help Group (SHG) siam tur 174 atangin 115 siam tawh anih thu tarlan a ni a. Khaw 12 tuam niin Beneficiaries 1490 an awm mek a ni. W.Phaileng RD Block-ah SHG Target 80 atangin 19 siam tawh a ni a, khaw 2 a tuam a ni. Reiek RD Block huamchhungah SHG Target 81 atangin 55 siam tawh a ni a. Khaw 5 tuamin Beneficiaries 523 an awm mek a ni.

Integrated Child Development Services (ICDS) hnuaia hnathawh hrang hrang thlirho a ni a. Supplementary Nutrition Programme (SNP) - ah Beneficiaries 19270 pek an nih thu tarlan a ni a. National Social Assistance Programme (NSAP) hnuaiah Beneficiaries 2393 pek mek an ni bawk. Pradhan Mantri Matru Vandana Yojana (PMMVY) hnuaia ICDS Project pathumah nu naupai mek inziaklutte chu mi 251 an awm thu tarlan a ni bawk. 

Integrated Power Development Scheme (IPDS) hnuaia Sub Station thar leh Transmission line hrang hrang Mamit - W.Phaileng, Mamit - Zamuang via. Tuidam leh Bairabi - W.Phaileng via. Mamit thawh mekte chu thlirho niin hmalak zel dan tur sawiho nghal a ni a. Deen Dayal Upadhyaya Gram Jyoti Yojana (DDUGJY) hnuaia thingtlang khuaa tha zawka eng pek an nih theih nan khaw 9-a hmalakna zawh tawh niin chung zinga 8 te chu hlawhtling taka test charge an nih thu tarlan a ni bawk.

Prime Minister Employment Generation Programme (PMEGP) hnuaia District Industries Center hmalaknain Beneficiary Applicants 26 atangin recommended 22 an ni a, chung zinga 10 te chu PMEGP Loan pek tawh an nih thu tarlan a ni.

National Health Mission (NHM) hnuaia District mipuite hriselna dinhmun thlirho a ni a. HIV thisen test 815 atangin mi 5 HIV Positive hmuhchhuah an ni a. Tunah hian Mizoram hi India rama HIV hrikpai tamna ber State kan nih avangin a thawktute tan la sauh sauh a, a tam thei ang ber mipuite hnena Awareness neih nise Meeting-ah hian tih a ni bawk. Heng bakah hian kan District chhungah Malaria vanga thi an awm tawh loh thu report a ni a. National Tobacco Control Programme hnuaiah pawh zuk leh hmuam nghei 86 kum kalta 3rd Quarter leh 4th Quarter chhung khan an awm thu report a ni bawk.

PWD Highway hnuaia NH-44A, Km 103.618 sial mek chu thlirho niin 69% a sial hna thawh tawh a nih thu Meeting-ah hian tarlan a ni. PWD Mamit Division, PMGSY hnuaia Mamit - Phaizau Road sial mek chu thlirho niin 45% thawh zawh tawh a ni a. Heng bakah hian Phuldungsei - Parvatui Road, Tuipuibari - Andermanik Road, Andermanik - N.Belkhai Road, Kawnmawi - Chhippui Road te chu Tender mek an nih thu tarlan a ni. PWD Kawrthah Division hnuaia Zawlnuam - Zawlpui Road Km 9 Rs 444.90 lakhs senga sial chu zawh tawh a nih thu tarlan a ni bawk.

Vawiin Meeting hi Pu John Rotluangliana, Minister, Mamit bialtu MLA leh Pu Lalrobiaka, ZIDCO Chairman, Dampa bialtu MLA ni bawkte'n an telpui a ni.