Directorate of School Education buatsaihin kumin 2019 HSLC (High School Leaving Certificate) leh HSSLC (Higher Secondary School Leaving Certificate) exam a topper panga te hnenah vawiin khan Vanapa Hall-ah he huna khuallian Chief Minister Pu Zoramthanga chuan chawimawina Chief Minister's Award a hlan. Zirlai tithate chawimawina inkhawmah hian School Education Minister Pu Lalchhandama Ralte chu khualzahawm a ni.

Chief Minister chuan toppers te chu a lawmpui thu hrilh in an kal zelna turah pawh taimakna thlah lova midang tana entawntlak ni thin turin a chah a. Tumruhna tello chuan a hlawhtlin theihloh a ni tiin Pu Zoramthanga chuan Pathianin mihringah thiamna leh theihna a dah vek a, hman tangkai thiam erawh mihring duh thu a nih avangin keimahni tumruhna hi a pawimawh tak zet a ni, a ti. Talent chu hman a nih loh chuan a chul chak a, hman tam chuan a hriam telh telh thung a ni tiin zirlai kalkhawmte chu an zirna ah leh kawng dangah an thiam thilte hmang tangkai turin a chah a. Chief Minister chuan thunlai thiamna in khawvel hi a sawr zim tawh em avangin tawng thiam tam a pawimawh zual zia sawiin zirlaite chu tawng thiam mai bakah tawng dan dik zir tel turin a chah bawk. Khuallian chuan mitin hi an hun neih theuh hlawk taka hmang thiam apiang mi vannei an nih thin thu sawiin, kalkhawmte chu an hmabak engkimah theihtawp chhuah thin turin leh chutih rual chuan taksa hriselna ngaipawimawh tel turin a chah.

Khualzahawm School Education Minister Pu Lalchhandama Ralte chuan zirlai hlawhtlinna changte leh an zirtirtute leh nu leh pa te a lawmpui thu a sawi bawk a. Chawimawi phu te kan chawimawi thin hi a hlu hlea ni tiin award dawngtute chuan vawiin an chawimawina dawn hi a bultanna chauh nih turin an rilru siam fel sea tih thu a sawi a. Sawrkarin India ram pum huap competitive exam a inziak tlingte tan pawh Mizoram Youth Commission kaltlangin incentive a siam thu tarlangin,  UPSC main inziak tling tan cash award cheng nuai 2, prelim inziak tling tan cheng nuai 1 dah a nih thu te leh SSC leh exam dang tan pawh dah a nih thu zirlaite a hrilh a. Minister chuan zirlaite chu heng incentive award te hi dawng chhunzawm zel tura pawha inpuahchah tura a duh thu a sawi. School Education Minister chuan ramin zirna lama hma a pan zel loh chuan ram pum leh hnam pum a tlukchhiat a hlauhawm thu sawii, mithin hi anmahni theuhavh zirna hmasawnna atang lungthu tangkai an nih theih theuh thu a sawi a. Vawiina sem leh chawimawina  dang cash award te hi tu tan bik mah zuah a nih ngailoh thu te,  tihtakzet a ngaihtuahna hmanga an nun uluk a Pathian tihna leh nu leh pa thuawihte hnenah lawmman hi pek thin a ni, a ti.

Chief Minister's Award hian citation leh pawisafai cheng sing nga theuh a keng tel a. Award dawngtute hi HSLC topper Lalrinnungi, St. Joseph HSS, Aizawl; HSSLC Topper (Arts) C. Lalvenhimi, Rev. Saiaithanga Memorial School, Aizawl; HSSLC Topper (Science) pahnih Akash Jyoti Sahoo leh Lalrintluanga Tlau, St. Paul's HSS, Aizawl a mi ve ve leh HSSLC Topper (Commerce) C. Lalnunhlimi, Oikos HSS, Aizawl te an ni.